Sfera.az xatırladır ki, pərakəndə ticarət 2020-ci ildə 1,3 faiz, 2021-ci ilin birinci rübündə 1,1 faiz azalmışdı. 

Rəsmi məlumatların təhlili göstərir ki, ilk 4 ayın yekununda pərakəndə ticarətin böyüməsi geyim və avtomobil yanacağına çəkilən xərclərin artması ilə bağlıdır. 

2020-ci ildə toxuculuq məhsulları və geyimə çəkilən xərclər 9 faiz azaldığı halda, bu ilin ilk 4 ayında 0,3 faiz artıb. Eynilə avtomobil benzini və dizel yanacağına çəkilən xərclər ötən il 12,5 faiz azalma ilə müqayisədə bu ilin yanvar-aprelində 0,2 faiz artım göstərib.

Digər əksər qeyri-ərzaq xərclərində azalma qeydə alınıb. Ancaq adları çəkilən istiqamətlər üzrə xərclərin artması qeyri-ərzaq xərclərindəki azalmanı xeyli kiçildib. Belə ki, 2020-ci ildə qeyri-ərzaq xərcləri 6,1 faiz azaldığı halda, bu ilin ilk 4 ayında azalma 2,3 faiz təşkil edib.

Ümumilikdə, bu ilin yanvar-aprelində alıcıların son istehlak məqsədilə aldıqları mallara xərclədiyi vəsaitin 49 faizi ərzaq məhsullarının, 5,9 faizi içkilər və tütün məmulatlarının, 13,7 faizi toxuculuq məhsulları, geyim və ayaqqabıların, 6,1 faizi avtomobil benzini və dizel yanacağının, 4,8 faizi elektrik malları və mebellərin, 2,4 faizi əczaçılıq məhsulları və tibbi ləvazimatların, 0,7 faizi kompüterlər, telekommunikasiya avadanlıqları və çap məhsullarının, 17,4 faizi isə digər qeyri-ərzaq mallarının alınmasına sərf olunub.