Çeçenistan müftisi müsəlmanların başqa dində olanlarla evliliyini QADAĞAN ETDİ
Çeçenistan Müftisi Salah-Hacı Mejiev hesab edir ki, Rusiya Müsəlmanları Ruhani İdarəsinin dinlərarası evliliyin qəbuledilməzliyi ilə bağlı teoloji nəticəsi İslamda məlum bir həqiqətdir.
Sfera.az xatırladır ki, bundan əvvəl, Müsəlmanların Ruhani İdarəsinin Üləmalar Şurası Rusiya ərazisindəki müsəlmanların "Kitab əhli"nin (xristianlar, yəhudilər) nümayəndələri də daxil olmaqla, dinlərarası nikahları qəbuledilməz adlandırmışdı.
Qeyd edilmişdi ki, bu cür evliliklər yalnız müstəsna hallarda - yerli müftinin qərarı ilə, qadın "Qurani Kərimin göstərişlərinə əməl etməyə hazır olduğunu” bildirdiyi, yəni, əvvəlki inancından imtina etdiyi halda mümkün ola bilər.
"Bu cür evliliklərə heç vaxt icazə verilməyib. Onsuz da hər kəs bilir ki, İslamda müsəlman olmayan qadınla nigah yasaq buyrulub, bu mövzuda müzakirə aparmağa, danışmağa ehtiyac yoxdur, çünki sözügedən məsələ ilə bağlı heç bir mübahisə və fikir ayrılığı yoxdur.",- deyə müfti bildirib.
Onun sözlərinə görə, bəzi İslam alimləri müəyyən şərtlər daxilində bu qəbildən olan evlilikləri mümkün sayır. O, vurğulayıb ki, adıçəkilən qadağa ailənin mənəvi əsaslarının möhkəmləndirilməsinə, boşanma və fikir ayrılıqlarının sayının azaldılmasına hesablanıb.
"Qadağa ailədə mənəvi harmoniyanın hökm sürməsi, uşaqların tərbiyəsində fikir ayrılıqlarının və mübahisələrin daha az olması və boşanma halında uşaqların əziyyət çəkməməsi üçündür: hər iki həyat yoldaşı İslamın mahiyyətini anlayırsa, bu proses ağrısız keçir",- deyə müfti vurğulayıb.
Selcan
Sfera.az