\"Dünyam yıxıldı\" - Rafael Dadaşovun qızı
15:39 / 16.03.2021
1601
"Mənim üçün əvəzolunmaz həm ata, həm də dost... Bir il keçir ki, səni itirdim. Dünyam yıxıldı”.
Sfera.az xəbər verir ki, bunu Xalq artisti Rafael Dadaşovun qızı, müğənni Səidə Dadaşova deyib. O, ölümündən bir il ötən aktyorla bağlı xatirələrini bölüşüb:
"İndi adını daşıyan oğlumdan təsəlli alıram. Xalqın sevimlisi, böyükdən kiçiyə hər kəsin kumiri, atam... Mənə sənsiz o qədər çətindir ki, hər şey üstümə gəlir. Amma mən güclüyəm, bu gücü səndən almışam. Həmişə deyərdin güclü ol, qızım, atan kimi güclü ol. Bax bu gün sənin kimi güclüyəm. Allah sənə rəhmət eləsin, xalqın Rafaeli”.
İfaçı qeyd edib ki, hərdən atasının yaşadığını, sadəcə uzaqda olduğunu təsəvvür edir: "Ona mesaj göndərib, necə sevdiyimi demək istəyirəm. Və oturub cavab gözləyirəm...".
Qeyd edək ki, Rafael Dadaşov dekabrın 2-də axşam saatlarında Mərkəzi Neftçilər Xəstəxanasına ürəyin işemik xəstəliyi, infarktdan sonrakı kardioskleroz və ağciyərlərin xroniki abstruktiv xəstəliyi diaqnozu ilə yerləşdirilmişdi. O,ötən ilin bu günü dünyasını dəyişib.
Rafael Dadaşov 1946-cı ildə Naxçıvanda anadan olub. 1972-ci ildə M.Əliyev adına Azərbaycan Dövlət İncəsənət İnstitutunu bitirən R.Dadaşov Akademik Milli Dram Teatrında çalışıb. O, 1987-ci ildə əməkdar artist, 2006-cı ildə Xalq artisti fəxri adlarını alıb. Azərbaycanda teatr sənətinin inkişafındakı xidmətlərinə görə 2019-cu ildə "Şöhrət” ordeni ilə təltif olunub. R.Dadaşov aktyor Məlik Dadaşov və Sofa Hüseynovanın oğludur.
Türkan
Sfera.az