Sfera.az bildirir ki, bunu deputat Bəhruz Məhərrəmov Kəlbəcərdə minaya düşərək vəfat edən jurnalistlərdən danışarkən deyib. Millət vəkilinin sözlərinə görə, baş verənlər terror hadisəsi, müşahidə edilən məlum yanaşma isə terrora dəstəkdir:

"Bu cür qərəzli və vicdansız yanaşma, o cümlədən, Ermənistan dövlətinin Beynəlxalq humanitar hüquqa əhəmiyyət verməməsi, 1949-cu il Cenevrə Konvensiyalarının tələblərini kobud şəkildə pozmaqla ərazilərimizi minalayaraq vətəndaşlarımıza qarşı cinayət əməllərini davam etdirməsi regionda belə insidentlərin yenidən təkrarlanmasına, mülki insanların tələfatının davam etməsinə zəmin yaradır. Mövcud mənzərə Cənubi Qafqazda sülh və əməkdaşlıq perspektivlərini sual altına almaqla, Ermənistanın özünün dövlət kimi xəritədən silinməsi üçün əsas yaradır. 

Hesab edirəm ki, baş verən hadisə beynəlxalq insan hüquq müdafiə təsisatları və media təşkilatları üçün bir imkandır və həmin təşkilatlar media mənsublarımızın faciəli şəkildə həlak olmasını və Ermənistanın humanitar cinayətlərini kəskin formada pisləyərək bəşəri dəyərlərinin müdafiəsi ilə məşğul olduqlarını sübut etməlidirlər. O cümlədən beynəlxalq ictimaiyyət Ermənistan və onun havadarlarından mülki insanları hədəfə alan terror siyasətinə son qoymağı tələb etməlidir".

Deputat Azər Badamov isə minalanmış ərazilərin xəritələri verilmədiyi və beynəlxalq ictimaiyyət vətəndaşlarımızın minaya düşərək həlak olmalarına susqunluqla yanaşmağa davam edəcəyi halda, hansı addımı atmalı olduğumuzdan söz açıb:

"Belə olarsa, ərazilərimizin minalardan təmizləməyin ən effektiv yolu həbs olunmuş erməni diversantlarını cərgəyə düzüb minalı ərazilərdə gəzdirməkdir. Qoy haylar özlərinin basdırdıqları minalarda məhv olunsunlar”.

Millət vəkili Vüqar Bayramov məsələ ilə bağlı qeyd edib ki, Vətən müharibəsi başa çatdıqdan sonra işğaldan azad edilmiş ərazilərimizdə 27 vətəndaşımız minaya düşərək həyatlarını itiriblər:

"Ermənistan tərəfinin minalanmış ərazilərin xəritəsini təqdim etməməsi, bu yöndə edilən çağırışları önəmsəməməsi ölkəmizə qarşı terror siyasətini davam etdirdiyinin göstəricisidir. Ümid edirəm, beynəlxalq qurumlar həmrəylik nümayiş etdirərək bu yöndə daha ciddi şəkildə addımlar atacaq”.

Digər deputat Aydın Mirzəzadə isə vurğulayıb ki, müharibə bitsə də, onun fəsadları hələ də bitmir: 

"Ermənistan beynəlxalq hüquq normalarını pozaraq minalanmış ərazilərin xəritəsini verməkdən imtina edir. Dünya bunu bilməli və Ermənistanın humanizmə zidd fəaliyyətinə layiq olduğu qiyməti verməlidir. Təəssüf ki, hələ də buna göz yumaraq Ermənistanı müdaifə edən ölkələr və qüvvələr var. Azərbaycan xalqı bunları unutmayacaq.

Biz Ermənistandan fərqli olaraq terrora terrorla, minalara minalarla cavab verməyəcəyik. Biz sivil ölkəyik. Ermənistana güclü dövlət olmaqla cavab veririk və daima daha da güclü olacağıq”.