“Beş güncə ölkəmiz Avropanın özü üçün yenilik sayılacaq ilkə imza ataraq, birinci Avropa Oyunlarının möhtəşəm açılışını etdi”.

Bu sözləri Editor.az-a açıqlamasında Milli Məclisin deputatı, professor Jalə Əliyeva söyləyib.

“Dünyanın 30-dan artıq dövlət və hökumət başçısı açılış mərasimində iştirak etdi. Minlərlə idmançı öz gücünü sınamaq üçün oyunlara qatıldı. Onminlərlə xarici qonaq oyunların keçirildiyi ərəfədə ölkəmizə təşrif buyurdu. Açılış mərasimində səslənən fikirlər, o cümlədən birinci Avropa Oyunlarına hazırlıq üzrə Təşkilat Komitəsinin sədri Mehriban Əliyevanın möhtəşəm çıxışı açılışa xüsusi rəng qatırdı. Hesab edirəm ki, birinci Avropa Oyunları ölkəmizin qarşısında çox geniş imkanlar açacaq. Azərbaycana turist axınını gücləndirəcək, ölkəmizin dünya miqyasında rolunu artıracaq. Biz sürətlə qloballaşan dünyada yaşayırıq. İdman həm də mədəniyyət deməkdir. Biz Azərbaycan idmanını zirvələrə qaldırmaqla, həm də milli-mənəvi dəyərlərimizi təbliğ edirik”.

Bəzi müxalifət fəallarının baykot çağırışlarından danışan millət vəkili bildirdi ki, həmin təklifi səsləndirənlər milli dəyərlərə arxa çevirirlər:

“Onsuz da kimin nə deməsindən və hansı arzuda olmasından asılı olmayaraq, ölkəmiz bu sınaqdan üzüağ çıxdı. Təxribatçı qüvvələrin arzuları bu dəfə də gözlərində qaldı. Özünü azərbaycanlı adlandıran adamların dövlətçiliyə qarşı fəaliyyəti nifrətə layiqdir və onların ölkəmizin adından danışmağa heç bir mənəvi haqqı yoxdur”.