ABŞ prezidenti Co Bayden Əfqanıstanda yerləşdirilmiş ABŞ hərbi qüvvələrinin mayın 1-dən etibarən çıxarılacağını bildirib.


Sfera.az xəbər verir ki, Bayden çərşənbə günü Ağ Evdən yayımlanan müraciətində amerikalılara ABŞ-ın bütün hərbi qüvvələrini 11 sentyabr tarixinə qədər Əfqanıstandan çıxaracağını deyərək bildirib ki, Dünya Ticarət Mərkəzi və Pentaqona edilən terror hücumlarından 20 il sonra orada qalmağa haqq qazandırıla bilməz:


"20 il əvvəl baş vermiş dəhşətli hücum səbəbiylə Əfqanıstana getdik. Bu, 2021-ci ildə orada qalmağımıza haqq qazandıra bilməz".

ABŞ lideri Əfqanıstanda Amerika hərbi qüvvələrinin mövcudluğuna nəzarət edən ikisi respublikaçı və ikisi demokrat olmaqla dördüncü prezident olduğunu bildirib və bu məsuliyyəti beşinciyə ötürməyəcəyinə söz verib:

"Müttəfiqlərimiz və tərəfdaşlarımız, hərbi liderlərimiz və kəşfiyyat mütəxəssislərimizlə, diplomatlarımız və inkişaf üzrə mütəxəssislərimizlə, Konqres və vitse-prezident Kamala Harris ilə yaxından məsləhətləşdikdən sonra mən belə bir nəticəyə gəldim ki, Amerikanın ən uzun müharibəsinə son qoymağın vaxtı gəlib çatıb. Amerika əsgərlərinin evə qatımasının vaxtı gəlib”.

O, ABŞ-ın Əfqanıstanda diplomatik və humanitar işlərə davam edəcəyini və Kabil hökumətinə dəstək verəcəyini əlavə edib.
Bayden ABŞ və müttəfiqlərinin Əfqanıstanın təxminən 300 minə yaxın əsgərinin təlimlərinə və təchiz edilməsinə kömək edəcəyini, eləcə də Əfqanıstan hökuməti ilə Taliban döyüşçüləri arasında sülh danışıqlarına dəstək verəcəyini qeyd edib.
 
ABŞ dövlət başçısı indi əsas diqqətin dünyada tüğyan edən COVID-19 pandemiyasına yönəldilməsinin vacibliyinə diqqət çəkib: "Pandemiyaya qalib gəlmək üçün qlobal sağlamlıq sistemini gücləndirmək məcburiyətindəyik. Çünki başqa bir pandemiya da olacaq".