Ruhun da çəkisi var imiş...

XX əsrdə amerikalı həkim Duncan MakDougall tərəfindən aparılmış qeyri-adi təcrübə bir əsrdən çox keçməsinə baxmayaraq, hələ də mübahisə mövzusu olaraq qalır. 

Sfera.az xəbər verir ki, MakDougall ölüm anında insan bədənində çəkidə baş verən dəyişikliklərlə ruhun fiziki varlıq olub-olmadığını sübut etməyə çalışmışdı.

Həkimin iddiasına görə, ölüm anında insan bədənindən təxminən 21 qram çəki itir. O, bu itkiyə səbəb kimi ruhun bədəni tərk etməsini göstərmiş və bu nəticəni “ruhun çəkisi” kimi təqdim etmişdi.

Təcrübə cəmi 6 nəfər üzərində aparılsa da, bu iddia həm elmi çevrələrdə, həm də ictimaiyyətdə geniş maraq doğurmuşdu. Lakin bir çox alim bu nəticələri qeyri-dəqiq və statistik baxımdan zəif hesab edərək rədd etmişdi. Tənqidlərə görə, ölüm anındakı çəki dəyişikliyi bədənin tərkibindəki maye və qazların çıxışı ilə izah oluna bilər.

Buna baxmayaraq, “ruhun 21 qram çəkisi var” fikri zamanla populyar mədəniyyətdə öz yerini tutdu. Bu konsepsiya sonradan “21 Grams” adlı məşhur Hollivud filmində də əsas mövzuya çevrildi.

Lakin hələ də bu tədqiqat elmi cəhətdən öz əksini tapmayıb.

Fidan Hacızadə
Sfera.az