"İranla sərhədlərimizin azad edilməsi beynəlxalq cinayətkarlığa qarşı mübarizə baxımından xüsusi önəmi var”.

Bu sözləri Sfera.az-a açıqlamasında İranla sərhədin düşmən tapdağından tam azad edilməsi prosesinin önəmini dəyərləndirərkən siyasi icmalçı Qulu Məhərrəmli deyib.

Hömsöhbətimiz hesab edir ki, daha həmin sərhəd zonasından silah qaçaqmalçılığına, narkotik maddələrin daşınmasına, habelə terrorçuların keçidinə imkan verilməyəcək:

"Azərbaycanın İranla sərhədlərinə tam sahib çıxması ilk növbədə beynəlxalq hüququn tələbidir. Baş verənlər suverenlik ifadəsidir, özünü müdafiə sisteminin təkmilləşməsidir. Çünki Dağlıq Qarabağda yaradılan oyuncaq rejim həmin əraziləri nəzarətdən kənar yerə çevirmişdi. Ora dünyanın müxtəlif yerlərindən silah gətirilir, narkotik madələr daşınır, terrorçular burada yuva salmaq üçün köçürülürdü.

Amma artıq Sərhəd Qoşunlarımız həmin ərazilərdə xidməti bərpa edib. Bu isə o deməkdir ki, həmin cinahdan sərhədlərimiz tam etibarlı şəkildə qorunur”.

Tanınmış jurnalist bu hadisəni dövlət təhlükəsizliyi baxımından da əhəmiyyətli və ciddi hadisə kimi dəyərləndirir:

"Bu bir ölkənin öz sərhədlərinə tam və etibarlı şəkildə nəzarət etməsi baxımından qiymətlidir. Ona görə də həmin hadisənin böyük hərbi, siyasi, iqtisadi əhəmiyyəti var. Bunu işğal olunmuş ərazilərimizin addım-addım azad olunması prosesində çox mühüm həlqə, ciddi mərhələ kimi dəyərləndirərdim. Sərhədə nəzarətin bərpa edilməsi dövlətin gücüdür, nüfuzunun artması və öz suveren hüquqlarını tətbiq etməsi deməkdir”.

Elçin

Sfera.az