Sfera.az-ın məlumatına görə, Milli Məclisin İctimai birliklər və dini qurumlar komitəsinin üzvü, ilahiyyat üzrə fəlsəfə doktoru Ceyhun Məmmədov Yenisabah.az-a açıqlamasında bildirib ki, Prezident və Mehriban xanım hər zaman milli-mənəvi dəyərlərimizə, dini-tarixi abidələrimizə böyük diqqət və qayğı göstəriblər:

"Azərbaycanda bir çox məscidlər təmir olunub. Heydər Əliyev Fondu davamlı bu istiqamətdə tədbirlər həyata keçirib. Diqqət çəkan məqamlardan biri də dünən Prezident və birinci xanımın Ağdama səfəri zamanı baş verdi. Oraya Mehriban xanımın özünün Quran aparması, onların məsciddə Allaha dua etməsi, məscid təmirsiz olsa belə, oranı ayaqqabısız gəzmələri onların bizim milli-mənəvi dəyərlərə, dinimizə böyük hörmətlərinin göstəricisidir. Biz bilirdik ki, belə dəyər Azərbaycanda var, amma Azərbaycan xalqı bir daha bunun əyani şahidi oldu”.

Millət vəkili vurğulayıb ki, Prezidentin məscidin qarşısında Azərbaycan xalqına müraciət etməsi də özündə müxtəlif mesajlar daşıyırdı:

"Bu mesajlardan biri də ondan ibarətdir ki, Azərbaycan öz dəyərlərinə sadiqdir. Prezident bütün çıxışlarında bunu vurğulayıb. Bu hər insanda olan bir xüsusiyyət deyil, onlar ən incə məqamlara belə fikir verirlər. Bu mesajlar bütövlükdə ondan ibarət idi ki, hər bir Azərbaycan vətəndaşı bizim dəyərlərimizə hörmətlə yanaşmalıdır. Biz bilirik ki, bizim dinimizə görə məscidə ayaqqabı ilə girmək olmaz. Lakin zaman-zaman belə xoşagəlməz halların şahidi olmuşuq. İndi isə prezident və birinci xanımın timsalında bunun əksini müşahidə etdik və biz bunu nümunə götürməliyik. Burada hamıya mesaj var və hər kəs öz mesajını almalıdır”.