Maraqlıdır, ölkə üzrə ev heyvanlarına koronavirusun aşkarlanması riski nə dərəcədədir? Sözügedən virus heyvanlarda da aşkarlanarsa, bu nə ilə nəticələnə bilər?

Məsələ ətrafında Sfera.az-a danışan Azərbaycan Tibb Universitetinin İnfeksion xəstəliklər kafedrasının dosenti İlham Bayramov virusun ev heyvanlarında aşkarlanacağı təqdirdə yoluxmanın sürətlə artacağını bildirib:

"Əgər ev heyvanlarında koronavirus aşkar edilərsə, virusun daha sürətlə yayılması mümkündür. Çünki məlum olduğu kimi heyvanlarda da asqırma, öskürmə funksiyası var. COVID-19-un yayılması da əsasən hava damcı yolu ilə baş tutur. Eyni zamanda xəstəlik insandan da heyvana keçə bilir".

Digər müsahibimiz infeksionist Vüqar Cavadzadəkoronavirusun 7 növünün insanda xəstəlik yarada biləcəyini diqqətə çatdırıb:

"Bundan əvvəl dünyada meymunlar üzrə koronavirus infeksiyası aşkar edilib. Ümumilikdə deyə bilərəm ki, koronavirus ailəsinin 40-dan çox növü var. Bu növlərdən cəmi 7-i insanda xəstəlik yaradacaq xüsusiyyətə malikdir. 40 növün içərisində olan digər formalar donuzlarda, quşlarda və digər heyvanlarda xəstəlik törədə bilir”.

Əzizə Zeynal

Sfera.az