- Hesab etmirəm ki, Dövlət Sərhəd Xidməti qəza xəbərini gec verib. Helikopter saat 10:36-da təlim meydanında təyin olunmuş meydançaya eniş edərkən qəzaya uğrayıb. Mən isə artıq saat 12 radələrində xəbəri rəsmi kanallardan almışdım. Hətta mən qəza xəbərindən sonra bir neçə televiziya kanalında müsahibə verdim. Baxın, qəza 10:36-da baş verib, lakin bu o demək deyil ki, həmin andaca ictimaiyyətə məlumat verilməlidir. Qəza yerinə baxış keçirilməli, qəza ilə bağlı məlumat toplanmalı, təfərrüatları araşdırılmalı və aşkarlanmalıdır ki, ictimaiyyətə də məlumat verilsin.

Qəzanın baş verdiyi Qaraheybət təlim meydanı çöllük bir ərazidir. Həmin əraziyə getmək, qəzayla hadisə yerində tanış olmaq da müəyyən bir vaxt tələb edir. Bu mənada hesab etmirəm ki, rəsmi qurum gec reaksiya verib. Əksinə DSX mətbuat xidməti vaxtında rəsmi məlumat verdi.

 

 

- Qəzanın təfərrüatları ilə bağlı indiki etapda nəsə demək doğru deyil. Bu, mütəxəssis yanaşması olmaz. Qeyd etdiyiniz kimi hadisə ilə bağlı hazırda Baş Prokurorluğun İstintaq İdarəsində Cinayət Məcəlləsinin müvafiq maddələri ilə cinayət işi başlanıb. Hesab edirəm ki, qəzanın təfərrüatları ilə bağlı müfəssəl məlumatı həm istintaqın yekunu, həm də helikopterin qara qutusu açılandan sonra əldə etmək olar. Bu baş verəndən sonra ictimaiyyətə də məlumat veriləcək. Hər halda hadisə haqda məlumat almaq vətəndaşların da haqqıdır. Hazırda bu və ya başqa formada sualların yaranmasını da anlayıram. Ancaq hesab edirəm ki, bu məsələdə tələsmək lazım deyil və istintaqın yekunu və qara qutudan əldə ediləcək məlumatları gözləmək lazımdır.

- Belə bir sualın verilməsi normaldır. Adətən bu kimi hallarda hadisənin xarici qüvvələr tərəfindən gerçəkləşməsi ehtimalı olur. Lakin həm də məntiqlə düşünmək lazımdır. Əvvəla, onu bilmək lazımdır ki, helikopter uçuş öncəsi bir yox, bir neçə texniki baxışdan keçir. Eyni zamanda uçuş meydançası yoxlanılır. Bunlar helikopterin uçuşa hazırlıq mərhələsidir. Bu müddət ərzində isə həm də uçuş əsnasında təhlükəsizlik tədbirləri görülür. Yekunda uçuşa hər hansı bir maneə və ya təhlükə yoxdursa icazə verilir. O ki qaldı qəzanın xarici qüvvələr tərəfindən həyata keçirilməsinə, bunu real saymıram. Baxın, döyüş helikopteri mülki helikopter deyil ki, hansısa "H" işarəti olan yerdə dayansın və açıq hədəf olsun. Bundan başqa hərbi helikopterlərin olduğu aerodromlar çox ciddi şəkildə qorunur. Bu məsələyə detallı toxunmaq istəmirəm, ancaq ümid edirəm ki, necə və nə cür qorunduğunu anladınız. Bütün bunları nəzərə alaraq deyə bilərəm ki, bu hansısa terror hadisəsi və ya kənar qüvvənin məqsədyönlü hücumu deyil.

 

- Qarakənd faciəsini yaxşı xatırlayıram. Lakin hər iki hadisənin helikopter qəzası olması və hadisələrin baş verdiyi ərazilərin adlandırılmasındakı "qara” sözündən başqa heç bir oxşarlıq görmürəm.