Bu ölkələr əhali sayından dəfələrlə artıq peyvənd sifariş edib – Yeni dalğaya hazırlıq, yoxsa...
13:15 / 26.04.2021
2853
Koronavirusla
mübarizə çərçivəsində bir sıra ölkələr özlərinə lazım olduğundan dəfələrlə artıq peyvənd sifarişi verib.
ABŞ, Kanada,
Böyük Britaniya, Avropa İttifaqı(Aİ) ölkələri və İsrail yaxın iki il üçün əhali
sayından 2-3 dəfə artıq vaksin sifariş ediblər. Məsələn, bu günə qədər yarım
milyarda qədər əhalisi olan Aİ 500 milyon doza alıb, ilin sonuna doğru daha 500
milyon alacaq. Bu azmış kimi, Aİ 2022-2023-cü illər üçün daha 1,8 milyard doza
vaksin almaqla bağlı müqavilə imzalayıb.
Maraqlıdır,
adı çəkilən ölkələrin əhalisinin sayından artıq vaksin sifariş etməsi
nəylə bağlıdır?
Mövzuyla bağlı Sfera.az-a danışan tibb elmləri doktoru, infeksionist
Vüqar Cavabzadənin sözlərinə görə, bəzi ölkələrin artıq vaksin sifariş
etməsi ədalətli deyil: "Görünən
odur ki, bəzi ölkələr normadan 5-6 dəfə artıq vaksin alır, bir sıra digər ölkələrdə
isə bir nəfər də olsa peyvənd oluna bilmir. Bu isə ədalətsiz yanaşmadır”.
İnfeksionistin digər ehtimalına görə isə dozadan artıq vaksin sifariş etmək həm də ehtiyat tədbiri kimi nəzərdən keçirilə bilər: "Fikirləşirlər ki, pandemiya hələ uzun müddət davam edəcək. Odur ki, 6 aydan sonra təkrar vaksinasiyaya ehtiyac yarana bilər. Ona görə də indidən alıb, yığırlar. Lakin bu ölkələr fikirləşməsin ki, yalnız öz vətəndaşlarını xilas etməklə dünyanı virusdan xilas edə biləcəklər. Ümumbəşəri problemə qarşı hamı birlikdə mübarizə aparmalıdır”.
Elçin
