Bu məhsullara görə ƏDV qaytarılmayacaq – SİYAHI
10:42 / 06.12.2021
1583
"ƏDV geri al kampaniyası çərçivəsində gələn
aydan tətbiq ediləcək dəyişikliklərlə bağlı "Vergi Məcəlləsi”nin 165-ci
"Verginin sıfır (0) dərəcəsi ilə tutulması” maddəsinə bir sıra dəyişikliklər
edilib. Artıq bu dəyişikliklər ötən cümə günü Milli Məclis tərəfindən təsdiq
olunub. Belə ki, yeni dəyişikliklərə əsasən, avtomobillər, alkoqollu içkilər və
tütün məmulatları alan zaman ödənilən ƏDV geri qaytarılmayacaq. Qeyd edək ki, əvvəllər
yalnız bu istisna neft və qaz məhsullarına tətbiq olunurdu”.
Sfera.az xəbər verir ki, bunu açıqlamasında
Milli Məclisin deputatı Vüqar Bayramov deyib.
Deputatın sözlərinə görə, tibb müəssisələri tərəfindən
göstərilən tibbi xidmətlərə görə ödənilən ƏDV-nin bir hissəsi gələn ildən
etibarən geri qaytarılacaq:
"Digər dəyişiklik yaşayış və qeyri-yaşayış sahələrinin
alınması ilə bağlıdır. Belə ki, yeni dəyişkiliyə əsasən, fiziki şəxs olan
istehlakçılar eyni binadan bir və ya bir neçə yaşayış və (və ya) qeyri-yaşayış
sahələrini aldıqda, ƏDV-nin qaytarılması alınmış yaşayış sahəsinin 500
kvadratmetr və qeyri-yaşayış sahəsinin 500 kvadratmetrdən çox olmayan hissəsinə
mütənasib ödənilmiş ƏDV-yə tətbiq edilir.
Qeyd edək ki, qaytarılan məbləğ nağdsız
qaydada ödənilmiş ƏDV-nin 15 faizini, nağd qaydada ödənilmiş ƏDV-nin 10 faizini
təşkil edir".
Turan Rzayev
