“Bu, Ermənistanın növbəti oyunudur...” – Tofiq Zülfüqarov
15:17 / 20.01.2022
1129
"Erməni
tərəfinin "Azərbaycanla dövlət sərhədinin demarkasiyası işlərinə başlamağa
hazırıq” bəyanatı xoş səslənsə də, reallıq ondan ibarətdir ki, bu da ermənilərin
növbəti oyunudur”.
Bu sözləri
Sfera.az-a sabiq xarici işlər naziri Tofiq Zülfüqarov Ermənistan Xarici İşlər
Nazirliyinin mətbuat katibi Vaan Unanyanın son açıqlamasını şərh edərkən deyib.
Onun
sözlərinə görə, qarşı tərəf əslində Azərbaycanın ərazi bütövlüyünü tanımaqdan
yayınmağa çalışır:
"Bilirsiniz,
sərhədlərin delimitasiyası və demarkasiyası texniki məsələdir. Bu proses bu gün
belə həll olunsa, proses texniki mahiyyət daşıyacaq. Sərhədi tanımaq üçün ilk
növbədə siyasi sənəd olmalıdır. Delimitasiya və demarkasiya isə siyasi sənəd
deyil. Rəsmi
Bakı indiki halda Ermənistan tərəfindən Azərbaycanın ərazi bütövlüyünü
tanımasını tələb etməlidir. Diqqət edin, Ermənistan tərəfi "şərt irəli sürmədən”
deyərək, faktiki olaraq Azərbaycanın ərazi bütövlüyünü tanımaqdan yayınmağa
çalışır. Ermənilər ərazi bütövlüyü tanımadan sərhədləri müəyyənləşdirmək istəyir.
Bu baş versə, heç bir effekti olmayacaq. Çünki ərazi bütövlüyünün tanınmadığı təqdirdə
rəsmi İrəvan hər an işğalçılıq siyasətinə davam edəcək”.
