\"Bu da planın tərkib hissəsidir” - Ekspert ABŞ-Türkiyə yaxınlaşmasını şərh etdi
14:47 / 10.06.2021
2303
"ABŞ və Rusiya Cənubi Qafqazda yeni strategiyasında Türkiyə ilə əməkdaşlığa üstünlük verəcək”.
Sfera.az-ın məlumatına görə, bunu politoloq Məhəmməd Əsədullazadə deyib. O qeyd edib ki, Qarabağ müharibəsindən sonra yeni bir nizamın formalaşması, Azərbaycan və Türkiyə tandeminin önə çıxması, bu prosesdə Rusiyanın da regionda aktivliyi Vaşinqtonun regionla bağlı strategiyasında yeni bir dəyişikliyə və aktivliyə yol açdı:
"Rusiyanın Cənubi Qafqazda inkişaf edən siyasi-hərbi planlarına qarşı ABŞ -ın təkbaşına mübarizə aparması xeyli dərəcədə zəifləyib. Bayden-Putin görüşündə Cənubi Qafqazda post-müharibə dövründə cərəyan edən Ermənistanla Azərbaycan arasında yaşanan gərginliklər müzakirə edilsə də, tərəflərin regionla bağlı siyasətində diametral fərqlilik qalacaq. Çünki Vaşinqtonun Rusiyanın regionda güclənməsini qəbul etməsi özünün Gürcüstan və Ermənistandakı siyasətinə ciddi zərbə vurur. ABŞ-ın məhz bu məsələdə Türkiyə amilindən istifadə edərək Cənubi Qafqazda Rusiyanın mövqeyini zəiflətmək siyasətinə üstünlük verməsi gözlənilir. ABŞ dövlət katibinin köməkçisinin regiona səfəri məhz bu planın tərkib hissəsidir”.
Politoloq bildirib ki, ABŞ-ın Türkiyə vasitəsilə Cənubi Qafqaz, Mərkəzi Asiya və Əfqanıstan siyasətində yeni bir strateji xətt ortaya qoyması reallaşır:
"İsveçrədə Bayden və Ərdoğanın görüşündə bu kontekstdə danışıqlar aparılacağı və razılaşmalar əldə ediləcəyi istisna deyil. Əsasən, Ərdoğanın Şuşaya gəlişi və buradan verəcəyi mesajlar Türkiyənin regional gücünü ortaya qoyacaq və ABŞ -da bu məsələdə onunla həmrəy olacaq. Regionda ciddi dəyişikliklər gözlənilir və baş verənlər Azərbaycana müsbət perspektivlər vəd edir. Buna baxmayaraq, Rusiya Qarabağda öz məsuliyyət zonasında situasiyanı gərginləşdirə bilər. Rusiyanın hətta separatçıların əli ilə atəşkəsi pozması mümkündür. Bu da Azərbaycan üçün əlavə dividentlər əldə etməsinə gətirib çıxara bilər. Ümumiyyətlə, ABŞ regiona Türkiyə vasitəsilə daxil olur. Hazırkı müstəvidə bu, Azərbaycanın maraqlarına uyğundur”.
Günay Rəsulqzı
Sfera.az