Bu fikirləri elektroenergetika sisteminin liberallaşdırılması ilə bağlı Sfera.az-ın suallarını cavablandıran iqtisadçı-ekspert Natiq Cəfərli bildirdi.

Azərbaycanda elektroenergetika sektorunda rəqabətə əsaslanan liberal bazar modelinə mərhələli keçid nəzərdə tutulur. Bu sahədə yeni münasibətləri tənzimləyən qanunvericilik bazası yaradılacaq. Əsas xarici təcrübə kimi isə Türkiyə təcrübəsi öyrənilir.

 

"Əgər Türkiyə təcrübəsi öyrənilərsə və uğurlu tətbiq edilərsə, çox faydalı olacaq. Türkiyədə 10 ildir ki, bazarın liberallaşdırılması ilə bağlı yaxşı model tətbiq edilir. Burada kiçik istehsal mənbələrinin yaradılmasına kömək edilir. Türkiyə Azərbaycan kimi Günəşli günlərin sayı çoxdur. Dövlət vətəndaşlara faizsiz kredit verərək, evlərinin və ya kənd təsərrüfatı obyektlərinin, məsələn, istixanaların üzərini günəş panelləri ilə örtməsi üçün imkan yaradır. Həmin Günəş panellərinin hesabına onlar müstəqil şəkildə elektrik enerjisi istehsal etməyə başladılar. Hazırda 4 milyona yaxın ailə bu sistemdən istifadə edir. Bəzi aylarda nəinki özlərini elektrik enerjisi ilə təmin edirlər, hətta generasiya edərək istehsal edilən əlavə enerjini dövlətə və ya özəl şirkətlərə satılmasına şərait yaradılır.

Əgər Azərbaycanda da buna bənzər yanaşma olacaqsa, bu, çox gözəl nəticə verəcək. Ölkəmizdə bu cür layihələri Aran, Abşeron yarımadasında həyata keçirilməsi səmərəli ola bilər. Bu regionlarda ilin 260-280 günü Günəşli olur və panellər vasitəsilə həmin günlərdə günəş enerjisinin istehsalını asanlaşdırır. İnsanlarımız dövlətin verdiyi faizsiz kredit hesabına öz infrastrukturunu quracaqsa, elektrik enerjisindən istifadəyə görə ödənişlər hesabına kreditləri qaytara bilərlər. İndi Günəş panelləri də ucuzlaşıb və onun dəyərini ödəmək çətin olmayacaq”.