Bölgənin \"açar ölkə\"si Azərbaycanla əlaqələri gərginləşdirmək nə ilə nəticələnə bilər? - Qərbə AÇIQ MESAJ
15:00 / 26.11.2020
1430
Xarici mətbuata açıqlamasında ABŞ-ın Avropadakı Quru Qoşunlarının sabiq komandanı general-leytenant Ben Hodges bildirib ki, Qərb Qara dəniz bölgəsində əlaqələrin inkişafında açar rolunu oynadığından Azərbaycana daha ciddi dəstək verməlidir.
Məsələ ilə bağlı Sfera.az-a danışan "Atlas” Araşdırmalar Mərkəzinin rəhbəri Elxan Şahinoğlu bildirdi ki, bu açıqlama ilə general Qərb siyasətçilərinə həmin addıma gedilməsə, sonradan bölgədə möhkəmlənməyin gec olacağını xatırladıb:
"Açıq şəkildə bununla Qərbə mesaj verir ki, Azərbaycan bölgənin açar dövləti olduğundan onunla münasibətləri gərginləşdirmək olmaz. Amma Qərbdə bu mesajları eşidən azdır. Son proseslər fonunda Qərbdəki bəzi dairələrin ermənipərəst mövqedən çıxış etdiyini gördük. Bir çoxları Azərbaycan haqlı olduğu halda, Ermənistana dəstək ifadə etdi. Fransa Senatının qəbul etdiyi sənəd bunun sübutudur. Eyni əhval-ruhiyyə ABŞ-da da hakimdir. Orada da ermənilərə simpatiya var”.
Həmsöhbətimiz qeyd etdi ki, general-leytenant Hodges məhz reallığı anladığından bu fikirləri səsləndirib:
"Qərbdə reallığı anlayanlar da var. Bir sıra sabiq generallar, sabiq diplomat Metyu Brayza bunlardandır. Vəziyyəti yalnız bölgə haqqında geniş məlumatı olan adamlar dəqiq bilir. Onlar başa düşür ki, Azərbaycana dəstək verilməməsi Qərbin bölgədəki mövqeyinin zəifləməsinə, sarsılmasına gətirib çıxara bilər. Azərbaycan torpaqlarının işğalından məlumatsız olanlar və yalnız ermənilərlə əlaqəsi olanlar ölkəmizə qarşı ədalətsiz mövqedən çıxış edirlər. Bu halda isə onların dövlətlərinin milli maraqları deyil, şəxsi maraqlardan çıxış edirlər”.
Elçin
Sfera.az