Ölkə başçısı İlham Əliyev paytaxt Bakının bir nömrəli probleminə çevrilmiş tıxacların aradan qaldırılması məqsədilə yolların genişləndirilməsinə dair göstəriş və tövsiyyələrini verib. İndi müvafiq qurumlar hərəkətə keçməli və həmin göstərişlərdən irəli gələn vəzifələrin icrasına başlamalıdırlar. Amma görünəın odur ki, bəzi qurumlar nəinki problemin həlli istiqamətində yeni təkliflər verməkdə acizdirlər, əksinə üzərlərinə düşən vəzifələri layiqincə yerinə yetirmədiklərindən mövcud problemlərin üzərinə yenilərini əlavə etməkdədirlər.

Sfera.az xatırladır ki, bu baxımdan Bakı Nəqliyyat Agentliyi (BNA) mənfi mənada "xüsusi fəallığı” ilə diqqət çəkir. BNA-ın yarıtmaz və "tamahın təmin edilməsinə” hesablanmış fəaliyyətinin nəticəsidir ki, paytaxtda hərəkətin intensiv olduğu küçə və prospektlərdə rüsvayçı vəziyyət yaranıb. Avtobus dayanacaqlarını taksi fəaliyyəti ilə məşğul olanlardan yığdıqları haqq qarşılığında onlar üçün duracağa çevirən BNA bəzi küçələrdə hərəkətin iflic olmasına səbəb olur.

Təqdim etdiyimiz videogörüntülərdən də bəlli olduğu kimi taksilər dayanacağı tam olaraq "işğal etdiyindən” marşrut avtobuslar məcburiyyət qarşısında qalaraq dayanacaqdan bir neçə metr irəlidə saxlamaq zorunda qalır. Videoda diqqəti çəkən digər məqam isə taksilərin dayanacaq yaxınlığında yola paralel yox, perpendikulyar şəkildə düzülməsidir ki, nəticədə onsuz da geniş olmayan yol bir qədər də daralır.

Amma digər məsələlərdə həmişə "gözüaçıq” olan BNA nədənsə paytaxt dayanacaqlarında hökm sürən bu biabırçılığı görmür, ya da görmək istəmir. Görünür, BNA üçün taksilərdən topladığı qazanc daha önəmlidir, nəinki Prezidentin tövsiyyə və göstərişləri...

Orxan