Sfera.az bildirir ki, 2020-ci ilin ikinci rübündən başlayaraq günəbaxan, qarğıdalı və zeytun yağı bahalaşır. Rəsmi məlumatlara əsasən, bu ilin yanvar-aprel ayları ərzində kərə və bitki yağlarının dəyəri 4,4 faiz yüksəlib. 

Qiymət artımını ayrı-ayrı yağ növlərindən daha aydın görmək olar. Azərbaycanda qarğıdalı yağının bir litrinin dəyəri orta hesabla 5,2 manat olub. Qiymət ilin əvvəlində 4,7 manat, ötən ilin aprelində 4,3 manat idi. Müqayisə göstərir ki, qarğıdalı yağının pərakəndə satış qiyməti son bir ildə 0,9 manat (21 faiz), ilin əvvəlindən 0,5 manat (9,6 faiz) artıb.

Günəbaxan yağının dəyəri hazırda 3,8 manatdır. Bu yağın qiyməti illin əvvəlində 3,3 manat, ötən ilin aprelində 2,9 manat  olub. Günəbaxan yağı son bir ildə 0,9 manat (31 faiz), ilin əvvəlindən 0,5 manat (15,2 faiz) bahalaşıb. 

Zeytun yağının da dəyəri yüksəlib. Amma günəbaxan və qarğıdalı yağları ilə müqayisədə bahalaşma sürəti zəifdir. Bu ilin aprelin sonunda litri 13,1 manat olan yağın dəyəri ilin əvvəlində və ötən ilin aprelində 12,9 manat olub. 

Bitki yağlarının bahalaşmasının səbəbi dünyada qarğıdalı, günəbaxan və zeytunun bahalaşması ilə əlaqəlidir. 

Qarğıdalının bir tonunun qiyməti ötən ilin aprelində 147 dollar olduğu halda bu ilin aprelində 269 dollar olub. Xammalın bahalaşması yağın da bahalaşmasını şərtləndirib. 

Günəbaxan yağının dəyəri isə son bir ildə 2 dəfədən çox yüksəlib. Bir il əvvəl 878 dollara təklif edilən günəbaxan yağının bir tonunun qiyməti hazırda 1920 dollardır. 

Zeytun yağının dünya bazar qiyməti də yüksəlişə meyillidir. Ötən il tonu 2800 dollara satılan zeytun yağı hazırda 4120 dollara təklif edilir.