"Milli Məclisin bu günkü iclasında 21 aprel Sərəncamı ilə Dərvişli kəndində subartezian quyuların qazılmasına vəsait ayrılmasına görə seçicilərimin və özümün adımdan Prezident İlham Əliyevə təşəkkür etdim. Həmçinin ümid və xahiş etdiyimi bildirdim ki, Biləsuvar rayonunun ümumilikdə su təminatının yaxşılaşdırılması barədə Sərəncamı da səbrsizliklə gözləyirik”.

Sfera.az-ın məlumatına görə bu sözləri millət vəkili Bəhruz Məhərrəmov sosial şəbəkədəki paylaşımında yazıb. Millət vəkili eyni zamanda çıxışı zamanı yaranan texniki problemin bəzi media orqanlarında xüsusi qabardılmasına da münasibət bildirib:

"Çıxış zamanı mikrofonda problem yarandı və maraqlıdır ki, medianı Biləsuvarın susuz qalmış əkin sahələrinin problemi və bu istiqamətdə çağırışımız yox məhz mikrofon məsələsi çəkdi. Həqiqətən, bu onu göstərir ki, bəzi media orqanlarını insanların durumu yox, "dramı" maraqlandırır.

Xanımlar və cənablar, əkin sahələri susuzluqdan məhv olur, burda insan taleyindən söhbət gedir. Bunu işıqlandırmaq lazımdır, mikrofonun işləməməyinin bizə bir ziyanı olmaz”.