Belçikada öldürülən seks işçisinin adı küçəyə veriləcək - FOTO
11:21 / 17.09.2021
1130
Belçikanın paytaxtı Brüsseldə küçələrdən birinə müştərisi tərəfindən öldürülən seks işçisinin adı veriləcək.
Sfera.az xəbər verir ki, şəhərin Varf məhəlləsindəki küçə "Eunice N. Osayande” adlandırılacaq.
23 yaşlı Nigeriyadan olan miqrant seks işçisi Eunice N. Osayande 2018-ci ilin 4 iyununda 17 yaşlı müştərisi tərəfindən çox sayda bıçaq zərbəsinə məruz qalaraq ölüb. Qanuna əsasən, təcavüzkarın mühakiməsi o zaman 18 yaşına çatmadığı üçün başlaya bilməzdi. Osayandenin Belçikaya gəlməsinə səbəb olan insan alverçiləri isə 2,5 ildən 4 ilədək həbs cəzasına məhkum ediliblər.
Brüssel Bələdiyyəsinin verdiyi açıqlamada Osayandenin küçə adı olaraq seçilməsinin əsas səbəbi öldürülən və cinsi zorakılığa məruz qalan qadınları unutmamaq olub.
Ölümündən bir neçə gün əvvəl Osayande yardım təşkilatlarından birinə müraciət edərək təhdid edildiyini və zorakılığa məruz qaldığını söyləyib. Qanunsuz olaraq Belçikada olan gənc qadın bu səbəbdən polisə gedə bilməyəcəyini bildirib.
Osayandenin ölümü fəaliyyət göstərdiyi məhəllədə böyük reaksiyaya səbəb olub. Bir çox seks işçisi etiraz nümayişləri təşkil edib. Osayande kimi əksəriyyəti nigeriyalı olan qadınlar şəhərin şimal məhəlləsi Şaerbekdə polislərin daha çox olmasını və təhlükəsizliyin artırılmasını tələb etmişdilər.
İnci
Sfera.az