Milli Məclisdə vətəndaşlarımızın qəbuluna start verdik. Parlamentin qəbul şöbəsində Biləsuvardan Mehman müəllim qonağım oldu, problemlərini dinlədim, habelə rayonu yaxşı tanıyan bir ziyalı kimi fikir və təkliflərini müzakirə etdik.

Sfera.az xəbər verir ki, bunu Biləsuvardan millət vəkili seçilən Bəhruz Məhərrəmov qeyd edib.

"Digər vətəndaşlar – xüsusən seçicilərim də bilsinlər ki, qapım və telefonum hər zaman açıqdır, Sizi hər zaman görməyə şad olaram, sadəcə yol uzaqdır, özünüzü əziyyətə salmayın, nəzərə alın ki, hər ay rayonda, hər bir kənddə qəbul keçirəcəyəm, hər birinizi elə yerinizdəcə dinləyəcəm, qanunun mənə imkan verdiyi qədər əlimdən gələni edəcəm ki, nə siz problemdə qalasız, nə də mən səlahiyyətimdə olan problemi həll edə bilmədiyimə görə vicdan əzabında boğulum. Bu yazdıqlarım da pafos deyil, əgər dövlətimizin başçısı özünü xalqın birinci xidmətçisi adlandırırsa, deputat niyə kənarda qalsın ki?”-deyə, o, əlavə edib.