Bakı Dövlət Universitetinin (BDU) Filologiya, Beynəlxalq münasibətlər və iqtisadiyyat, Fizika fakültələrində Tələbə Həmkarları İttifaqı Komitəsinin (THİK) təşkilatçılığı ilə 31 Mart - Azərbaycanlıların Soyqırımı Günü ilə bağlı silsilə anım tədbirləri keçirilib. Tədbir soyqırım qurbanlarının xatirəsinin bir dəqiqəlik sükutla yad edilməsi ilə başlayıb.

Filologiya fakültəsində keçirilən tədbirdə dekan müavini Anar Fərəcov çıxış edərək illər boyu davam edən erməni vandalizmi, XX əsrin əvvəllərində törədilən mart soyqırımı, soyqırıma dövlət tərəfindən verilən diqqətdən bəhs edib.

Tədbirdə fakültənin I kurs tələbələri Rəhiməxanım Əlipənahova, Nigar Xanəliyeva, Günel Əliyeva və fakültənin THİK sədri Sezər Məmmədli mart soyqırımı, həmin dövrün ziddiyyətli ictimai-siyasi vəziyyəti, geniş vüsət almış erməni qəsbkarlığı haqqında ətraflı məlumat verib.

BDU-nun Humanitar məsələlər və gənclər siyasəti şöbəsinin müdiri Ramin Səmədov mart soyqırımı ilə bağlı məlumat verərək bu kimi tədbirlərin mütəmadi olaraq keçirilməsi və Azərbaycan həqiqətlərinin dünya ictimaiyyətinə çatdırılmasında gənclərin fəallığının vacibliyini vurğulayıb.

Beynəlxalq münasibətlər və iqtisadiyyat fakültəsində keçirilən tədbirdə tariximizi tanıtma yolunda tələbə-gənclərin üzərinə düşən vəzifələrdən bəhs olunub.

Tədbirdə Tarix fakültəsinin dosenti Ələmdar Şahverdiyev çıxış edərək Bakı Soveti və erməni silahlı dəstələrininazərbaycanlılaraqarşı törətdikləri qırğın barəsində tələbələrə məlumat verib. Eyni zamanda, rəsmi mənbələrə əsasən soyqırımı nəticəsində 12 minə yaxın azərbaycanlının qətlə yetirildiyini, on minlərlə insanın itkin düşdüyünü vurğulayıb. Sonra Beynəlxalq münasibətlər və iqtisadiyyat fakültəsinin tələbəsi İbrahim Özsoyun 31 mart soyqırımı haqqında çıxışı dinlənilib.

Fizika fakültəsində 31 Mart Soyqırımına həsr olunmuş tədbir dekan müavini Məhəmməd Məhərrəmovun moderatorluğu, tələbələr Ramazan Hüşənov və Səbinə Süleymanovanın aparıcılığı ilə keçirilib. Tədbirdə THİK üzvləri - Nərmin Həsənli, Səbinə Süleymanova, Zabitə Məmmədova, Əfruz İsmayılova, Ramazan Hüşənov, Elnaz Muxcanova, Çinarə Mustafayeva, Lamiyyə Həmidova və Cəmilə İsgəndərova çıxışlarında mart soyqrımı haqqında məlumat veriblər. Tələbə Turan Daşdəmirovun mart hadisələri ilə bağlı hazırladığı videoçarx təqdim olunub.