Baydenin hakimiyyətə gəlişi Azərbaycan üçün mühüm olan bu layihənin BƏXTİNİ AÇA BİLƏR
12:03 / 22.01.2021
1759
ABŞ-da demokratların hakimiyyətə gəlməsi Beynəlxalq Şimal-Cənub Nəqliyyat Dəhlizi layihəsinin
həyata keçirilməsinə imkan yarada bilər. Bu layihə Hindistandan Avropaya ixrac
edilən yüklərin İran, Azərbaycan və Rusiya vasitəsilə çatdırılmasını nəzərdə
tutur. İndiyədək Azərbaycan və Rusiya layihə üzrə işləri tamamlayıb. Lakin İran
öz ərazisindən çəkilməli olan dəmir yol xəttini tamamlaya bilməyib.
Sfera.az xatırladır ki, İranın dəmir yol xəttinin çəkilişini
tamamlaya bilməməsi ABŞ-ın sanksiyaları ilə əlaqədardır. ABŞ-da Donald Tramp
hakimiyyətə gəldikdən sonra İrana sanksiyaları bərpa etdi. Sanksiyalar çoxşaxəli
oldu və İranın kredit cəlb etməsini, xarici şirkətlərlə, eyni zamanda başqa ölkələrlə
əməkdaşlağını məhdudlaşdırdı. Sanksiyalar İranın maliyyə təminatını çətinləşdirdiyindən
dəmir yol xəttinin çəkilişi mümkünsüz oldu.
ABŞ-ın yeni prezidenti, demokrat Cozef Bayden
andiçmə mərasimindən sonra bəyan edib ki, İrana qarşı sanksiyalar yumşaldıla bilər.
Sanksiyaların yumşaldılması İranın dollarla əməliyyatlar aparmasına, xaricdən
kredit cəlb etməsinə, satdığı neft və qazın pulunu bank sistemi vasitəsilə əldə
etməsinə imkan yaradacaq. Bu vəziyyətdə İranın region üçün böyük əhəmiyyət
daşıyan dəmir yol xəttinin tamamlanmasına nail olacağını gözləmək olar.
Beynəlxalq Şimal-Cənub Nəqliyyat Dəhlizi layihəsi
Azərbaycan üçün əhəmiyyətlidir. Nəqliyyat Dəhlizi layihəsi 2000-ci ilin
sentyabrında İran, Rusiya və Hindistan tərəfindən dövlətlər arasında nəqliyyat əlaqələrini
inkişaf etdirmək məqsədi ilə hazırlanıb. Bu layihənin reallaşdırılmasında mühüm
rol oynayan ölkələrdən biri Azərbaycandır.
Dəhliz vasitəsi ilə yüklərin gəmilərlə Hindistanın
Mumbay limanından İranın Bəndər-Abbas limanına gətirildikdən sonra qatarlara
yüklənməsi və İranın mövcud dəmir yolu ilə Qəzvin-Rəşt-Astara (İran), sonra Astara
(Azərbaycan) dəmir yolu xəttinə ötürülməsi və birbaşa Azərbaycan ərazisindən
Rusiyaya, oradan da Şimali Avropa ölkələrinə çatdırılması planlaşdırılır.
Hazırda Hindistandan göndərilən yüklər Şimali
Avropaya çatdırılması üçün uzun yol qət edir. Yüklər Süveyş kanalından keçməklə
Avropaya çatdırılır. Yolun uzun olması səbəbindən yüksələrin çatdırılması vaxtı
45, bəzən 60 gün çəkir. Şimal-Cənub dəhlizi işə düşəndən sonra isə yüklərin 14,
ən geci 20 gün ərzində Şimali Avropaya çatdırılacağı gözlənilir.
Vasif
Sfera.az
