“Bayden elə şərtlər irəli sürür ki, Putin danışıqlardan imtina etsin” – Görüş baş tutacaqmı?
11:11 / 16.04.2021
1191
"ABŞ prezidenti Co Baydenin Putinə görüşmək təklifi
gözlənilməz oldu. Cəmi bir neçə həftə bundan əvvəl "qatil” adlandırdığı şəxslə
üzbəüz oturub beynəlxalq aləmdə baş verən mühüm hadisələri müzakirə etməyə məhz
Amerika prezidenti cürət edə bilərdi”.
Bunu Sfera.az-a açıqlamasında politoloq
Əlimusa İbrahimov deyib. O bildirib ki, Baydenin təklifi amerikalıları dünyanın
digər siyasi dairələrindən daha çox təəccübləndirib:
"Bayden Amerikanın xarici siyasətini ayaqüstə,
heç kimlə məsləhətləşmədən, öz bildiyi kimi həyata keçirir. Bu da siyasətdə
Bayden effekti , yaxud həddən artıq yetişməyin kənar təsiridir. Görüşlə əlaqədar
əsas problem isə vaxtın və yerin müəyyənləşdirilməsidir. Bayden dünya ictimaiyyəti
qarşısında nüfuzunu itirməmək üçün çox qısa zamanda görüşün keçirilməsinə
çalışır. Yaxud, görüş öncəsi Rusiyanın
qarşısına elə məsələlər qoyur ki, Putin və Rusiya yaranan şəraitdə görüşün
keçirilməsindən imtina etsin. Putinin görüşdən imtina etməsi ona görə zəruridir
ki, məhz bu halda Bayden ABŞ prezidenti kimi imicini qoruya biləcək”.
Politoloq bildirib ki, Putin təklif olunan
görüşdən imtina edənə oxşamır: "Bu görüşün baş tutması Putin üçün çox böyük əhəmiyyət
kəsb edir və o, ilk dəfə haqqında deyilən
xoşəgəlməz ifadələrin cavabını üzbəüz vermək imkanına malik olacaq. Məlumdur
ki, Putin-Tramp qarşıdurması birincinin böyük üstünlüyü ilə başa çatdı. Amma bu
ən azı bir prezidentlik müddətində baş verdi. Co Bayden isə Putin qarşısında
hakimiyyətdə olduğu ilk ildə duruş gətirə bilməyəcək. Amerika xarici siyasət
idarəsini narahat edən də elə məhz budur”.