Sfera.az xəbər verir ki, müqaviləyə əsasən, ölkədə ilk dəfə olaraq "British Council” BANM-də yaradılan bu Qeydiyyat Mərkəzində onlayn imtahan vermək istəyən şəxslərin qeydiyyatını həyata keçirəcək. Müqaviləni Bakı Ali Neft Məktəbinin rektoru Elmar Qasımov və "British Council” təşkilatının Azərbaycan üzrə direktoru Fransis Qardener Trexo imzalayıb.

BANM-in kampusunda Böyük Britaniyanın Azərbaycandakı fövqəladə və səlahiyyətli səfiri Ceyms Şarpın iştirakı ilə keçirilən imzalanma mərasimində Ali Məktəbin rektoru Elmar Qasımov bildirib ki, bu layihə "British Council” ilə BANM arasında əməkdaşlığın növbəti mərhələsidir: ""British Council” təşkilatı ilə əməkdaşlıq çərçivəsində BANM-də açılan ACCA Mərkəzi dünyadakı 5 ACCA Mərkəzindən biridir. Mərkəz artıq qısa müddətdə ikinci yerə yüksəlib və burada təxminən 50 nəfər çalışır.

10 ildir yaradılan Bakı Ali Neft Məktəbi Böyük Britaniya ilə uğurlu əməkdaşlıq edir və bunda "British Council” təşkilatının böyük rolu var. Bakı Ali Neft Məktəbi də 10 il əvvəl Prezident İlham Əliyevin fərmanı ilə ingilisdilli yüksəkixtisaslı kadr hazırlamaq məqsədilə yaradılıb və 10 ildir ki, uğurla ingilisdilli texniki ixtisaslı kadrlar hazırlayır. Ali Məktəbin məzunlarının bir çox nüfuzlu şirkətlərdə çalışır, dünyanın ali məktəblərində təhsil almaq üçün təqaüd qazanır və Ali Məktəbin tədris və idarəetməsində fəal iştirak edirlər”.

Səfir Ceyms Şarp BANM-lə "British Council” arasındakı bu əməkdaşlığı təhsildə keyfiyyətin yeni aspekti olaraq qiymətləndirib: "İngilis dili bu günün və gələcəyin dilidir, burada da bu dilin tədrisinə xüsusi önəm verilir. Bakı Ali Neft Məktəbi ilə bu əməkdaşlığa başlamaqdan çox şadıq və gələcəkdə də yeni əməkdaşlıqlara məmnuniyyətlə hazırıq”.

Fransis Qardener Trexo müqavilənin əhəmiyyətindən danışaraq qeyd edib ki, əsası qoyulan bu əməkdaşlıq tələbələrə fərdi şəkildə kömək etməklə yanaşı, ingilis dilinin ən yüksək səviyyədə öyrədilməsinə imkan verəcək. O, bu əməkdaşlığın BANM üçün də böyük fayda gətirəcəyini və xüsusiləşmiş əməkdaşlıq olacağını bildirib.