Bakıda maraqlı və fərqli toy baş tutub. Bu ay paytaxt restoranlarının birində ailə həyatı quran ‎Graeme və Vüsalə Vaughan qeyri-adi toy təşkil ediblər. Ənənəvi toy məclislərdən fərqlənən mərasimdə cütlük 1920-ci illərin ab-havasını yaradıblar. Bu barədə Aile.lent.az-a danışan gəlin Vüsalə xanım bildirib ki, fərqli toy etmək ideyası onun və həyat yoldaşının caza olan sevgisindən yaranıb: "Hər ikimiz cazı çox sevirik. Cazın da ən çox inkişaf etdiyi dövr 20-ci illərə təsadüf edir. Caza olan sevgimizdən belə qərara gəldik ki, elə toyumuz da cazla zəngin və 20-ci illərin ab-havası, əhval-ruhiyyəsində olsun”.

Vüsalə və Graemenin toyunda restoranın dizaynı və tərtibatından tutmuş, qonaqların geyimi və saç düzümlərinə qədər hər bir detal 20-ci illərə uyğun olub. Fərqli toyun xərci də çox olmayıb: "Dəvətnamədə dress-kod olduğunu qeyd etmişdik. Heç kim də buna etiraz etmədi. Gəlinliyi modelyer Zümrüd Mirzəliyeva xüsusi olaraq mənim üçün tikdi. Rəfiqələrimlə də birlikdə alış-veriş etdik, onların geyimini seçdik. Çox çətin olmadı, əsasən saç düzümü, aksessuarlar, ayaqqabılarla 20-ci illərin dəbini əks etdirməyə çalışdıq. Məkanı da özümüz bəzədik. Şəkil çəkdirmək üçün xüsusi guşə də yaradılmışdı. Sadəcə olaraq dekorasiyaya bir az pul xərclədik. Demək olar ki, adi toylarla sərf edilən pul qədər maliyyə xərclədik”.

Cütlüyün toyunda da əsasən caz musiqiləri üstünlük təşkil edib. Məclisdə tanınmış müğənnilər Təranə Mahmudova, İlqar Xəyal, Fuad Əsədov, DJ İlqar Sky, saksafon ifaçısı İlham Nəcəfov çıxış edib. Toydan xüsusi anları rejissor Oktay Namazovun komandası videolentə alıb. Fotolar Elturan Məmmədova məxsusdur.