Sfera.az BFB-yə istinadən xəbər verir ki, ilin ilk 9 ayı ərzində qiymətli kağızlar üzrə keçirilən əməliyyatların ümumi həcmi 11,95 milyard  manat olub. Ötən ilin ilk 9 ayının nəticələri ilə müqayisədə birjada ümumi ticarət həcmində 39%, ilkin bazar üzrə ticarət həcmində 6%, dövlət qiymətli kağızlar bazarı üzrə ticarət həcmində 10%, repo əməliyyatları üzrə isə 292% böyümə qeydə alınıb.

 

2021-ci ilin sentyabr ayının son ticarət günü üzrə BFB-nin kapitalizasiyası ilin əvvəlinə nisbətən 10% artaraq 4,29 milyard manat təşkil edib. 

Bazar əməliyyatlarının ən çox hissəsi dövlət qiymətli kağızlar üzrə əməliyyatlardan ibarət olub. Dövlət qiymətli kağızları üzrə əməliyyatların əsas hissəsi Mərkəzi Bankın qiymətli kağızları ilə bağlı olub. Burada 6,2 milyard manatlıq əqdin 4 milyard manatı Mərkəzi Bankın apardığı əməliyyatlardır. Maliyyə Nazirliyinin dövlət istiqrazlarının əməliyyat dəyəri isə 1,32 milyard manat təşkil edib. 

Bu il repo (Mərkəzi Bank (və ya bir kommersiya bankı) tərəfindən qiymətli kağızların digər banka sonradan geri almaq şərti ilə satışıdır) əməliyyatları da xeyli artıb. Repo əməliyyatlarının dəyəri 5,411 milyard manat təşkil edib. Bu əməliyyatların 5,14 milyard manatı dövlət istiqrazları ilə bağlı olub.