Bağ evlərinə tələbat azaldı, qiymətlər endi: 500 manata...
13:16 / 07.08.2021
1476
"Azərbaycanda ötən il karantin dövründə bağ evlərinə tələbat da, qiymətlər də artmışdı. Artıq bu il vəziyyət tamamilə başqa cürdür”.
Bunu Sfera.az-a açıqlamasında əmlak məsələləri üzrə ekspert Elnur Fərzəliyev deyib. O bildirib ki, bu il rayonlara gediş-gəliş açıqdır və bağ evlərinin qiymətləri pandemiya dövründəki qiymətlərdən aşağı düşüb:
"Karantin dövründə qiymətlər süni şəkildə artmışdı. Yeni tikili binalar kimi bağ evlərinin də böyük bir hissəsi boşdur. Bu qəbildən olan evləri kirayə götürən kimlər idi? Adətən həmin şəxslər gələn tursitlər və Rusiyada, digər xarici ölkələrdə yaşayan adamlar idi. Onlar yayda gələndə 5-10 günlük bağ evi kirayələyirdilər və dincələ bilirdilər. Lakin keçən il də, bu il də sözügedən kateqoriyaya aid adamlar gəlmədi və bu sahə boş qaldı.
Düzdür, ötən il bağ evlərini sırf şəhər sakinləri doldurdu. Bunun səbəbi də sərt karantin rejimi idi. Amma bu gün Bakı heç kim üçün maraqlı deyil. Yəni paytaxtda istirahət ediləsi yerlər yoxdur desək, yanılmarıq. Məcburən insanlar Azərbaycanın digər bölgələrinə üz tuturlar, gəzirlər, ev kirayələyirlər”.
Müsahibimiz bağ evlərinin minimum, maksimum qiymətlərindən də söz açıb:
"Bununla bağlı konkret qiymət demək mümkün deyil. Bina evlərində əraziyə görə qiymətlər dəyişir, amma bağ evləri tamamilə fərqlidir. Dənizə yaxınlığı, evin böyük-kiçikliyi, təmiri, rahatlığı, hovuzu və s. kimi amillərə görə məbləğ dəyişir. 500 manatdan 8 min manata qədər aylıq kirayəsi olan evlər var. Ötən il qiymətlər qalxsa da, bu il qiymətlər əvvəlki yerini alıb. Amma tələbat əvvəlki illər qədər deyil”.
Günay Rəsulqızı
Sfera.az