Azərbaycanlılar səyahət üçün hansı ölkələri seçir? – Bəs, əcnəbilər bizim hansı şəhərlərimizə üstünlük verir...
16:05 / 01.06.2021
2544
Yay aylarına yaxınlaşdıqca turizm mövsümü də canlanır. Artıq bir çox vətəndaşlarımız bu yay
hansı ölkədə dincələcəklərini də dəqiqləşdiriblər.
Maraqlıdır, bəs dincəlmək üçün Azərbaycanı seçən əcnəbilər
arasında hansı ölkənin vətəndaşları çoxluq təşkil edir?
Azərbaycan Turizm Agentlikləri Assosiasiyasının
Ekspertlər Şurasının sədri Göydəniz Qəhrəmanov Ərəb və Avropa ölkələrindən ölkəmizə
böyük maraq olduğunu bildirib. Ekspert səyahət üçün daha çox seçilən şəhərlərimizin
adını da açıqlayıb:
"Məlum olduğu kimi, karantin səbəbilə turistlər
ölkəmizə gəlməkdə çətinlik çəkir. Bununla belə səyahət üçün ölkəmizi seçən və
Azərbaycana gəlmək istəyən turistlərin sayı çoxdur. Daha çox Ərəb və Avropa ölkələridən
olan turistlər Azərbaycana gəlmək istəyində olur.
Aprel ayında Dubayda ilk böyük sərgi təşkil edilib
və Azərbaycan öz stendini canlı olaraq orada nümayiş etdirib. Biz onda gördük
ki, Ərəb ölkələrindən olan vətəndaşlar Azərbaycana daha çox maraq göstərir.
Turistlərin səyahət etmək istədikləri istiqamətlər isə Bakı, Qəbələ, Şəki və
Qaxdır. Əcnəbilər Qarabağ bölgəsinə indi daha çox maraq göstərir. Lakin hələ ki,
bu istiqamətdə biz onların səfərlərini təşkil edə bilmirik. Çünki işğaldan azad
olunnmuş ərazilərdə lazımi infrsatruktur qurulmalıdır".
Ekspert azərbaycanlı turistlərin yay mövsümü üçün Türkiyəyə
axın etdiyini qeyd söyləyib: "Azərbaycan vətəndaşlarının getmək istədikləri
ölkələr sırasında həmişə olduğu kimi Türkiyə liderdir. Bildiyiniz kimi Türkiyə
ilə sərhədlərin açıq olması da buna imkan verir. Türkiyə üzrə vətəndaşlarımızın
ən çox getdiyi şəhərlər isə Antalya və Bodrum istiqamətindədir. Bundan başqa Rusiya
və Ukraynaya səyahət etmək istəyən vətəndaşlarımızın da sayında artım
var".
Əzizə Zeynal