\"Azərbaycanın müstəqilliyini şübhə altına alan iranlı deputat sorğulanmalıdır\" - SƏRT AÇIQLAMA
11:46 / 11.10.2021
986
"Azərbaycanın müstəqilliyini şübhə altına alan İran parlamentinin deputatı sorğulanmalıdır".
Sfera.az xəbər verir ki, bunu deputat Aydın Mirzəzadə Milli Məclisin bu gün keçirilən iclasında deyib. Deputat eyni münasibətin deputat həmkarı tərəfindən göstərilərkən parlament tərəfindən ona lazımi münasibətin göstərildiyini xatırladıb:
"Azərbaycan hər zaman İrana qarşı dostluq münasibətində olub. Bu günlərdə İran parlamentinin bir deputatı Azərbaycan müstəqilliyini şübhə altına aldı. Mən İran parlamentinə müraciət edib deyirəm ki, niyə həmin deputata heç nə deyilmir? Biz İranla bağlı deputat Bəhruz Məhərrəmov sərt danışarkən, onu məzəmmət etdik. İran da eyni addımı atmalıdır. Azərbaycan müstəqilliyi ona görə qazanmayıb ki, sonradan kiminsə təsiri altına düşsün. Bu gün İrana qarşı qonşuları tərəfindən ən yaxşı münasibət Azərbaycan tərəfindən göstərilir. İran nə üçün bu cür mövqe nümayiş etdirir?".
Xatırladaq ki, İran parlamentinin Milli Təhlükəsizlik və Xarici Siyasət üzrə Komissiyasının üzvü, millət vəkili Mojtaba Zolanuri Azərbaycan və Türkiyəni təhdid edib. İranlı millət vəkili guya iki ölkənin birgə fəaliyyətinin İran üçün təhdid yaratdığını iddia edərək "Heç kimə güzəştə getməyəcəyimizi bilsinlər. İranın təhlükəsizliyini, milli maraqlarını təhdid edən hər kəsi cəzalandırmaq gücümüzün olduğunu sübut etdik”, - deyə vurğulayıb.
Əzizə Zeynal
Sfera.az