Azərbaycanda mənzil tikintisi kəskin azaldı - SƏBƏB
14:17 / 20.04.2021
1721
Bu il istifadəyə verilən yaşayış evlərinin ümumi sahəsində ötən illə müqayisədə ciddi azalma var.
Sfera.az rəsmi məlumatlara istinadən bildirir ki, birinci rübdə 481,8 min kvadrat metr yaşayış evləri tikilib. Bu, əvvəlki illə müqayisədə 46,4 faiz azalma deməkdir.
Ötən ilin birinci rübündə 898 min kvadrat metr yaşayış evi istifadəyə verilmişdi.
Xatırladaq ki, 2020-ci ildə də istifadəyə verilən yaşayış evlərinin sahəsi kəskin azalmışdı. Ötən il azalma 47,6 faiz təşkil etmişdi.
2020-ci ildə istifadəyə verilən yaşayış evlərinin sahəsindəki azalma 2019-cu ildəki böyük artımla bağlı idi. 2019-cu ilin fevralın 19-da "Bəzi çoxmənzilli binaların istismarına icazə verilməsinin sadələşdirilməsi haqqında” Azərbaycan Prezidenti Fərman imzaladı. Həmin fərmana əsasən, əvvəlki illərdə tikilən və müəyyən səbəblərə görə istismarına icazə verilməyən bəzi çoxmənzilli binaların istismarına 2019-cu ildə icazə verildi. Buna görə də 2019-cu ildə istifadəyə verilən mənzillərin sahəsi 3,9 dəfə artaraq 8,74 milyon kvadrat metri ötdü.
2020-ci ildə də istifadəyə verilən mənzillərin sahəsi böyük idi. Amma əvvəlki ildəki yüksək göstərici ilə müqayisədə kiçilmə qeydə alındı.
2021-ci ildəki nəticə isə pandemiyanın yaratdığı vəziyyətlə əlaqəlidir. Ötən il karantinin tətbiqi mənzil tikintisinin həcmini azaltdığından bu il istifadəyə verilən mənzillərin ümumi sahəsi kiçilib.
Vasif
Sfera.az