"Hər şey insanların davranışından və Nazirlər Kabineti Yanında Operativ Qərargahın tələblərinə necə əməl etmələrindən asılı olacaq”.

Sfera.az-a açıqlamasında bu sözləri koronavirus təhlükəsi fonunda sosial şəbəkələrdə Azərbaycanda komendant saatının tətbiqi vacibliyinin gündəmə gətirilməsinə münasibət bildirərkən Milli Məclisin deputatı Elman Nəsirov deyib.

Deputatın sözlərinə görə, bu istiqamətdə Azərbaycan dövləti şəraitə adekvat şəkildə addımlar atır: "Azərbaycan dövləti ümumbəşəri bəlaya çevrilmiş bu virusa qarşı mübarizədə ardıcıl, sistemli və önləyici addımlar atır. Dövlətimizin həyata keçirdiyi tədbirlər şəraitə adekvat şəkildə olur. Fikir verirsinizsə, atılan addımlar getdikcə sətrləşir.Yaranmış vəziyyətdə sosial şəbəkələrdə müzakirə olunan komendant rejiminin tətbiqi məsələsi yəqin ki, pandemiyaya qarşı mübarizə prosesində məsuliyyət məsələsinə bəzi insanların yanlış düşüncə ilə yanaşması reallığından qaynaqlanır. "Evdə qal” tələbinə əməl edənlərin sayı nə qədər çox olsa da, yenə də onu pozanlar olur”.

E. Nəsirov bildirdi ki, komendant rejimi Fövqəladə Vəziyyət Haqqında Qanunda öz əksini tapıb: "Fövqəladə vəziyyət tətbiq edilərkən məhz onun ən mühüm komponentlərindən biri də komendant saatının tətbiqi məsələsidir. Ona görə də hesab edirəm ki, müəyyən insanların məsuliyyətsizliyi, bu qədər tələb və karantin rejiminin sərtləşdirilməsinə baxmayaraq yenə də məsuliyyətsiz yanaşmalar davam edərsə, proseslər komendant rejiminin tətbiqinə doğru gedə bilər. Novruz Bayramı ilə bağlı xalqa müraciətində Azərbaycan Prezidenti İlham Əliyev vurğuladı ki, məsuliyyətsiz hərəkətlər davam edəcəyi təqdirdə, təhlükəsizliyin təmini üçün fövqəladə vəziyyətin tətbiqi də istisna olmaya bilər. Hər şey insanların davranışı və Nazirlər Kabineti Yanında Operativ Qərargahın tələblərinə necə əməl etmələrindən asılıdır”.

Elçin

Sfera.az