Artımın sayəsində reklam bazarının ümumi daxili məhsula (ÜDM) nisbəti də artıb. 2019-cu ildə reklam bazarı ÜDM-nin 0,09 faizi qədərində olduğu halda, ötən il 0,11 faizə yüksəlib. 

Reklamlardan əsasən qeyri neft-qaz sektorunda istifadə edilir. Buna görə də reklam bazarının həcminin qeyri neft-qaz ÜDM-nə nisbəti də önəmli göstəricidir. Bu göstərici 2019-cu ildəki 0,15 faizdən, 2020-ci ildəki 0,156 faizə yüksəlib. 

Xatırladaq ki, reklam bazarının ÜDM-yə nisbətində ən yüksək göstərici 2014-cü ildə qeydə alınmışdı. Həmin tarixdə reklam bazarının ÜDM-yə nisbəti 0,122 faiz, qeyri neft-qaz ÜDM-nə nisbəti 0,2 faiz olub.

 

Reklam bazarının 75,63 milyon manatı reklam fəaliyyəti hesabına formalaşıb. Burada reklam informasiyalarının hazırlanması 30,26 milyon manat, reklamın yerləşdirilməsi 12,61 milyon manat, reklamın yayılması 32,7 milyon manat həcmində bazar payını yaradıb. 

Reklam yayım xərclərinin yarıdan çoxu açıq məkandakı reklamlar üçün ayrılıb. Açıq məkanda reklama 18,85 milyon manat xərclənib ki, bu da cəmi yayım xərclərinin 57,5 faizidir. 

Bu sahə üzrə reklam xərcləri son illərdə bir neçə dəfə artıb. 2015-2016-cı illərdə açıq məkanda reklama 3-4 milyon manat xərcləndiyi halda 2018-2019-cu illərdə xərc 9-11 milyona yüksəlib. Ötən il isə açıq məkanda reklama rekord məbləğdə pul xərclənib. 

Ənənəvi reklam sahəsi olan teleradio proqramlarında reklam xərcləri cəmi 10,5 milyon manat təşkil edib. Bu məbləğ 2017-ci ildəki göstəricidən 2 dəfə çox olsa da 2014-cü ildəki göstəricidən 2 dəfə azdır. 

Qəzet və jurnallarda reklamlar isə azalaraq 2018-ci ildə minimuma düşüb. Çap mediasında reklam xərcləri 2015-ci ildə 1,4 milyon manat olmuşdusa, 2018-ci ildə 100 min manata qədər geriləyib.