Azərbaycanda biznes kreditlərinə tələb kəskin artıb
13:16 / 27.11.2021
960
Azərbaycanda sahibkarlıq fəaliyyəti ilə məşğul olan ev təsərrüfatlarına 2021-ci ildə verilən kreditlərin həcmi kəskin şəkildə artıb.
Sfera.az Mərkəzi Banka istinadən xəbər verir ki, banklar tərəfindən ev təsərrüfatlarına verilən biznes kreditlərin həcmi bu il 477 milyon manat, yəni 56,3 faiz artaraq 1,324 milyard manata çatıb.
Qeyd edək ki, bu məbləğə vaxtında geri qaytarılan kreditlərin məbləği daxil edilib.
Ötən ilin sonunda ev təsərrüfatlarının biznes kreditləri üzrə borcu 847 milyon manat, 2018-ci ilin sonunda 499 milyon manat olmuşdu.
Dinamika göstərir ki, son illərdə ev təsərrüfatlarının biznes krediti istəyi xeyli artıb və bunun nəticəsində onların banklardan aldıqları borclarda biznes kreditlərinin payı sürətlə artır. 2018-ci ildə ev təsərrüfatlarının ümumi kredit borclarının 9,73 faizi biznes kreditlərindən ibarət olduğu halda, hazırda bu göstərici 16,86 faizdir.
Bu fakt onu göstərir ki, ev təsərrüfatlarına verilən kreditlərdəki artımda biznes kreditlərinin xüsusi rolu böyüyür.
Ev təsərrüfatlarının sahibkarlıq fəaliyyəti ilə bağlı aldığı kreditlərin məbləğinin artması onun ümumi biznes kreditlərindəki payını da artırır. İki il əvvəl cəmi biznes kreditlərinin 6-7 faizini ev təsərrüfatları aldığı halda hazırda nisbət 14 faizi ötüb.
Qarşıdakı illərdə nisbətdəki böyümənin bir qədər də artacağı yəqindir.
Vasif
Sfera.az