Azərbaycana ucuz avtomobillərin idxalı artır
12:01 / 16.09.2021
695
Azərbaycan 2021-ci ilin ilk 8 ayında 56 361 ədəd avtomobil idxal edib. İdxal edilən avtomobillərin 52 488 ədədi minik, 3 675 ədədi yük, 198 ədədi digər təyinatlı avtomobillərdir.
İdxal olunan avtomobillərin gömrükdə olan ümumi dəyəri 571,76 milyon dollar təşkil edib. Minik avtomobillərinin ümumi dəyəri 490,1 milyon dollar, yük avtomobillərinin cəmi dəyəri 44,82 milyon dollar olub.
Sfera.az rəsmi məlumatlara istinadən xəbər verir ki, idxal edilən avtomobillərin sayı 2020-ci ilin eyni dövrünə nisbətən 23 183 ədəd (70 faiz), avtomobillərin dəyəri isə 172,25 milyon dollar (43,11 faiz) artıb.
Avtomobillərin idxalına çəkilən xərcin artmasına baxmayaraq idxal edilən avtomobillərin orta qiyməti bir qədər də aşağı düşüb. 2020-ci ilin yanvar-avqust ayları ərzində idxal edilən bir avtomobilə orta hesabla 12 041 dollar xərclənibsə, bu il eyni dövründə 10 144 dollar xərclənib. Cari dövrdə idxal avtomobillərinin orta qiyməti 1 897 dollar azalıb.
Əvvəlki illərlə müqayisədə idxal edilən avtomobillərin dəyərində azalma daha yüksəkdir. 2019-ci ilin ilk 8 ayında idxal edilən avtomobillərin orta qiyməti təxminən 17 min, 2018-ci ilin eyni dövründə 17,5 min dollar olub.
Qiymət azalmasının əsas səbəbi ölkəmizə hibrid, yəni daxili yanma mühərriklə yanaşı elektrik mühərriklə də hərəkətə gətirilən avtomobillərin, həmçinin mühərrik həcmi kiçik olan digər avtomobillərin idxalının artmasıdır.
Bu ilin 8 ayında 7 234 ədəd hibrid avtomobili idxal edilib. Onların birinin orta qiyməti 6 200 dollar olub. Hibrid avtomobilləri cəmi idxal avtomobillərinin 12,83 faizini, minik avtomobillərinin 13,8 faizini təşkil edib. 2020-ci ilin səkkiz ayında hibrid avtomobillərin idxal sayı 3 050 ədəd (orta qiymət 5 736 dollar) idi.
Azərbayvan bu ilin ilk 8 ayında 52 488 minik avtomobili idxal edib ki, onların da orta qiyməti 9 337 dollar olub. Ötən il minik avtomobillərinin orta qiyməti 11 232 dollar idi.
Vasif
Sfera.az