Sfera.az-ın məlumatına görə, bunu Azərbaycan İnternet Forumunun rəhbəri Osman Gündüz deyib. Onun sözlərinə görə,  ölkəmizdə  elektron məktəb, "e-learning” sistemləri zamanında qurulmayıb:

"Artıq "Microsoft Teams” və onunla yanaşı Microsoftun Office 365 alətləri, Mail, Calendar, OneDrive və s. proqramları da Azərbaycan dilinə tərcümə edilib.  Yəni, necə deyərlər, Microsoft Teams milliləşdirilərək "Virtual məktəb” milli platformasına çevrilib.

Əlbəttə, çox funksiyalı bu tip resursları hazırlamaq və ona proqram-texniki dəstək vermək ağır bir işdir. Uzun zaman və ciddi resurslar, maliyyə və kadr resursları, böyük data mərkəzlər tələb edir. Eyni zamanda Təhsil nazirliyi Microsoft şirkəti ilə qarşılıqlı anlaşma ilə bu resursun milliləşdirilməsi istiqamətində xeyli addımlar atıb. Texniki dəstək komandası formalaşıb, funksionallığı xeyli genişləndirilib. Bütün bunlar təqdirəlayiqdir. Bildiyim qədər, Azərbaycan hökuməti bu resursdan istifadə üçün Microsoft-a xeyli vəsaitlər də ödəyir”.

Ekspert vurğulayıb ki, buna baxmayaraq, son zamanlar "Virtual məktəb”də bəzi funksionallıqlarda, xüsusilə də  video resursların saxlanılması ilə bağlı müəyyən məhdudiyyətlər olur:

"Düşünürəm ki, milli təhsil sisteminin dayanıqlıqlığı və təhlükəsizliyi baxımından, həmçinin qarşıdakı illərdə xarici qurumların daha sərt şərtlərindən sığortalanmaq üçün ayrıca , Azərbaycana məxsus milli təhsil platformasının yaradılması doğru olardı. Eyni zamanda, Türkiyənin də özünəməxsus oxşar təhsil platforması var və alternativ olaraq bu sistemdən də istifadə məsələlərinə baxıla bilər. 

Fikrimcə, ölkənin bütöv təhsil sisteminin bir platforma, xüsusilə də yalnız bir xarici platforma üzərində "oturması" ciddi risklər yaradır. Bu baxımdan  milli təhsil platformamız yaradılmaqla alternativlərin olması təhsil və informasiya təhlükəsizliyi sahəsində  milli maraqlarımıza uyğun olardı. Təhsil nazirliyi,  Nəqliyyat, Rabitə və Yüksək Texnologiyalar Nazirliyi, Elektron Hökumətin İnkişafı Mərkəzi  bu istiqamətdə indidən işlərə başlamalıdırlar”.