Milli Məclisin Gənclər və idman komitəsinin üzvü, deputat Vüqar İskəndərov mərhum nazirlə bağlı təəssüratlarını Sfera.az-la bölüşüb.

 

"Həqiqətən də Azad Rəhimov əvvəla, bu sahəni bilən əvəzsiz dövlət məmurlarından biri idi. İkinci məsələ - Azad Rəhimov qısa müddətdə çox demokratik ruhlu, düzgün və səmərəli idarəetmə sistemi qurdu. Sözün əsl mənasında, bu insanla rahat işləyirdik. Gənclər və idman siyasətini həyata keçirən bir insan kimi qısa vaxt ərzində gənclər təşkilatlarının nümayəndələri ilə görüşdü, onların problemlərinin öyrənilməsi ilə bağlı bir çox önəmli addımlar atdı.

İdman ictimaiyyəti ilə də görüşlər təşkil etdi – federasiyalarla, klubların rəhbərləri və.s.  Nazirlik səviyyəsində artıq bütün dinlənilmiş məsələlər analiz olunaraq mərhələli şəkildə görüləcək işlərin hansı formada keçirilməsi yol xəritəsi kimi qarşıya qoyuldu. Ölkəmizdə gənclərin vətənpərvər ruhda tərbiyə olunması üçün tədbirlər planı hazırlandı və əhəmiyyətli addımlar atıldı. Eyni vaxtda idmanla bağlı olimpiya yığma komandalarının təlim-məşq toplanışlarının keçirilməsi üçün həm xaricdə, həm ölkə daxilində bütün şərait yaradıldı. Demək olar ki, heç bir federasiyada olimpiya idman növlərində və digərlərində böyük yarışlara, dünya, Avropa çempionatlarına hazırlıqlar istiqamətində maliyyə problemləri yaranmadı, problemlər öz həllini tapmağa başladı”.

"O, hər bir insana fərdi yanaşmaq keyfiyyətinə malik biri idi. Hamını özünün dostu sayırdı. O dövrdə həqiqətən də ölkəmizdə gənclər və idman sahəsi prioritet sahələrdən birinə çevrildi. Həm tələbələrlə bağlı iş, həm gənclərin vətənpərlik tərbiyəsi, onların hərtərəfli istedadlarının üzə çıxarılması, inkişafı üçün işlərin görülməsi, idmançılarımızın uğurlu nəticələri bunu deməyə əsas verirdi. Bunların hər biri dövlət başçımızın bu sahəyə xüsusi diqqət və qayğısı, eyni zamanda Milli Olimpiya Komitəsinin, Gənclər və İdman nazirliyinin birgə fəaliyyəti kimi də qeyd olunmalıdır”.

Sfera.az xatırladır ki, Azad Rəhimov 1964-cü il oktyabrın 8-də Bakı şəhərində anadan olub. O, Bakı şəhəri 134 nömrəli orta məktəbi bitirib, 1981–1986-cı illərdə Azərbaycan Pedaqoji Xarici Dillər İnstitutunda ingilis dili fakültəsində ali təhsil alıb.

Rəhimov 1986–1987-ci illərdə hərbi xidmət keçdikdən sonra 1987–1990-cı illərdə rayon komsomol təşkilatında katib və birinci katib, 1990–1993-cü illərdə Azərbaycan Gənclər Təşkilatları Komitəsinin sədri vəzifələrində işləyib, 1993-cü ildən dövlət idarəçiliyinə gələnədək sahibkarlıq fəaliyyəti göstərib. 2006-cı ildə Azərbaycan Respublikasının gənclər və idman naziri təyin olunan Azad Rəhimov ömrünün sonunadək bu vəzifəni icra edib. Həmin illərdə eyni zamanda Azərbaycan Milli Olimpiya Komitəsinin vitse-prezidenti olub.