ATƏT PA-nın xüsusi nümayəndəsi: "İlkin hesabat sabah təqdim olunacaq"
"İlkin təəssüratlarım budur ki, biz seçki məntəqlərində yaxşı qarşılandıq. Biz məcburi köçkünlər üçün təşkil olunan səsvermə məntəqələrində olduq. Burada müstəqil müşahidəçilər, namizədlərin müşahidəçiləri öz müşahidələrini aparırlar".
APA-nın xəbərinə görə, bunu ATƏT PA-nın xüsusi nümayəndəsi Andreas Notelle deyib.
Xüsusi nümayəndə bildirib ki, səhər seçki başlayandan 6 seçki məntəqəsində olub: "Bu gün digər müşahidə missiyalarının nümayəndələri ilə müzakirələr aparacağıq. Həmçinin Mərkəzi Seçki Komissiyasının müşahidəçiləri ilə görüşümüz gözlənilir".
Xüsusi nümayəndə deyib ki, sabah müşahidələrlə bağlı ilkin hesabat təqdim olunacaq: "Deyə bilərəm ki, bu hesabat kifayət qədər uzun, təxminən 15 səhifədir. Yekun hesabat isə seçkidən bir neçə həftə sonra dərc olunacaq və orada tövsiyələr yer alacaq".