Tanınmış hüquqşünas Aslan İsmayılov iqtisadi inkişaf naziri Mikayıl Cabbarova müraciət ünvanlayıb.

Sfera.az xəbər verir ki, hüquqşünas bir qədər öncə nazir tərəfindən elan edilən müsabiqənin nəticələri ilə maraqlanıb:

"Hörmətli Mikayıl müəllim, sizin 21 yanvar 2020-ci ildə elan etdiyiniz "Yüksəliş” müsabiqəsinə mən də inandım və vətəndaşlarımıza, xüsusən gənclərə bir neçə dəfə müraciət etdim ki, həmin müsabiqədə aktiv iştirak etsinlər. Öz Facebook və İnstaqram səhifələrimdə bir neçə dəfə sizin müraciəti paylaşdım və bununla bağlı yazılarım da oldu.

Həmin müraciətin üstündən artıq 6 aya yaxın vaxt keçib və ən azından mən onun nəticələri barədə heç bir məlumat oxumamışam. Elan etdiyiniz islahatlara insanların inanması üçün bütün işlərin şəffaf olması çox vacibdir. Ona görə xahiş edirəm ki, ictimaiyyətə məlumat verəsiniz ki, həmin proqramda neçə nəfər iştirak etdi və iştirakçılarıdan konkret kimlər hansı vəzifələrə təyinat aldılar. Sizin elan etdiyiniz islahat proqramına başqaları kimi mənim də inanmağım üçün bu, çox vacibdir.

Əgər bu proqram həqiqətən savadlı azərbaycanlı gənclərini dövlət idarəçiliyinə cəlb etmək idisə nəticələrini hamı bilməlidir və əmin olmalıdır ki, keçmişdə olduğu kimi vəzifələrə kimlərinsə qohumları, dostları yox, həqiqətən öz savadı, zəhməti ilə haqq etmiş gənclər təyin olundular.

Bu günə qədər heç vaxt kimlərinsə oyununda iştirak etməmişəm və etməyəcəm. Bu gün də kimlər üçünsə illərlə vətəndaşlarda qazandığım inamı heç nəyə və heç kimə görə itirmək fikrim yoxdur. Yenə də ölkədə ağlın üstün gələcəyinə, həqiqi islahatların olacağına inanıram. Ancaq son dövrlər baş verən gözəl çıxışların, proqramların, müsabiqələrin real nəticələrini görmədikcə artıq mənim də inamım tükənir.

Bir şeyi dəqiq bilin: bu gün sizin komandanın uğuru bərli-bəzəkli proqramlardan, müsabiqələrdən, çıxışlardan deyil, real nəticələrdən asılıdır”.