“Arayik Arutunyana cavab verilməməlidir, bu səhvi buraxmamalıyıq” - Açıqlama
11:51 / 18.06.2021
2481
"Arayik Arutunyan və qondarma qurumun verəcəyi
qanunların, işlədəcəkləri ifadələrin heç bir hüquqi əsası yoxdur. Real mənzərə
ondan ibarətdir ki, 44 günlük müharibədə Azərbaycan Ermənistanı məğlub edərək
öz ərazi bütövlüyünü bərpa edib”.
Bunu Sfera.az-a açıqlamasında politoloq Turan
Rzayev separatçı rejimin "işğal olunmuş ərazilər haqqında” qondarma "qanun
layihəsi” barədə danışarkən deyib. O bildirib ki, Arutunyan bu tip bəyanatlar
verməklə öz varlığını göstərməyə çalışıb:
"O, bununla rəsmi Bakını qıcıqlandırmağa və
dolayı yolla ona siyasi cavabın verilməsinə səy göstərir. Azərbaycan tərəfi isə
qondarma qurumun atdığı addımlarla bağlı heç bir reaksiya vermir. Bəzən bu hal
cəmiyyətimizdə də tənqid olunur. Əslində ölkə rəhbərliyinin addımı doğrudur.
Çünki Azərbaycan beynəlxalq hüquqla tanınan ölkədir və bu gün bizim qondarma
quruma və ya onun rəhbəri Arayikə cavab verməyimiz faktiki olaraq onu tanımaq,
eyni zamanda onunla özümüzü bir mərtəbəyə qoymaq anlamına gələr. Heç bir halda,
Azərbaycan bu diplomatik səhvi etməməlidir”.
"Digər tərəfdən Azərbaycanın icazəsi ilə Ermənistanla
bağlantıları mövcuddur. Bu gün Azərbaycan istədiyi an Laçın dəhlizini bağlamağa
qadirdir. Son prosesləri nəzərə alsaq, bizim əlimiz daha güclüdür. Hər an
Arayik Arutuyana qarşı anti-terror əməliyyatı keçirilə bilər, hər an yeni "Dəmir
Yumruq” əməliyyatını görə bilərik”.
Günay Rəsulqızı