“Anna Akopyan buna icazə verməz” – Paşinyan oğlunu Bakıya göndərmək istəyində səmimidir?
11:01 / 09.06.2021
3092
"Paşinyanın rəhbəri Anna Akopyandır. O, oğlu Aşotun dəyişdirilməsinə icazə verməz. Sadəcə olaraq, Nikol boş-boş danışır ”.
Bunu Sfera.az-a açıqlamasında Milli
Məclisin deputatı Elman Məmmədov Ermənistan Baş Naziri vəzifəsini icra edən
Nikol Paşinyanın Azərbaycan Prezidenti İlham Əliyevə əsirlikdə olan
diversantların əvəzinə oğlu Aşotu götürməsi təklifi ilə bağlı danışarkən deyib.
Millət vəkili qeyd edib ki, Azərbaycana qarşı cinayət
işləmiş şəxslərin hamısı cəzasını alacaq: "Əsirlər nə Paşinyanın oğlu, nə də başqası ilə dəyişdirilə bilməz. Azərbaycan haqq-ədalət məhkəməsini qurub, onların
cinayətləri sübuta yetirilib və onlar layiqli
cəzalarını alırlar.
Digər tərəfdən dünən Laçında saxlanılan erməni əsgəri ilə
bağlı araşdırılma aparıldı və müəyyən edildi ki, Ermənistan silahlı
qüvvələrinin hərbi qulluqçusu Artur Kartanyan Azərbaycan ərazisinə
təxribat-diversiya məqsədilə daxil olmayıb, sadəcə yolunu azıb. Ona görə erməni
əsgər təhvil verildi. Bu, Azərbaycanın növbəti humanist addımı idi. Ancaq bu
cinayətkarlar nə etdilər? Kəlbəcərdə öz doğma kəndlərinə gedib ziyarət edən 3 nəfərdən birini
öldürdülər, digər ikisini illərlə işgəncələr altında həbsdə saxladılar.
Paşinyanın isə seçkiqabağı belə sərsəmləmələri çox olacaq”.
Politoloq Züriyə Qarayeva bildirib
ki, Paşinyanın sonuncu bəyanatı onun
seçki öncəsi ab-havada olduğunu sübut edir: "Həmçinin bu açıqlama radikal
ittihamlarla çıxış edən rəqibləri Köçəryan və Sarkisyanı susdurmaq niyyəti
daşıyır. Bəyanat eyni zamanda Rusiyanın bu mövzuda heç bir kömək əlini
uzatmadığını ictimaiyyətə siqnal vermək niyyətinin və diversantların
qaytarılması müqabilində Ermənistan tərəfinin bütün "güzəştlərə" gedə
biləcəyinin göstəricisidir”.