“AMEA-nın heç bir faydası yoxdur, QHT kimi fəaliyyət göstərsin” – Natiq Cəfərli
12:36 / 04.05.2021
2342
"AMEA-nın dövlət qurumu kimi qalmasının heç
bir faydası yoxdur, o qeyri-hökumət təşkilatı kimi fəaliyyət göstərməlidir”.
Bu sözləri Sfera.az-a açıqlamasında Azərbaycan
Milli Elmlər Akademiyasında hansı islahat və yeniliklərə ehtiyac olmasından
danışarkən ReAL-ın icra katibi Natiq Cəfərli deyib:
"Dünyada belə təşkilatlar qeyri-hökumət təşkilatı
kimi fəaliyyət göstərir. Bu mənada Azərbaycanda
Milli Elmlər Akademiyasının bir dövlət qurumu kimi qalmasının heç bir faydası və
mənası yoxdur. Elm universitetlərə qaytarılmalıdır. Təhsillə elm bir-birilə
uzlaşmalıdır. Ən vacibi təhsillə elm və istehsalatın, yəni iqtisadiyyatın bağı
yaranmalıdır. Azərbaycanda isə bu da
yoxdur”.
N,Cəfərli düşünür ki, əslində Elmlər
Akademiyasının əsas fəaliyyəti müəyyən kəşf
və araşdırmalar nəticəsində əldə edilən yeni məhsul və texnologiyaların
iqtisadiyyata tətbiqindən ibarət olmalı idi: "Lakin uzun illərdir, bunu görmədik. Azərbaycanda bunun hansısa parlaq örnəkləri
yoxdur. Odur ki, Elmlər Akademiyası qeyri-hökumət təşkilatı kimi alimlərin
ümumi fəaliyyətini kordinasiya edən, konfrans və müzakirələr təşkil edən orqana
çevrilməlidir.
Elm universitetlərə qaytarılsa, təhsillə elm
arasında ciddi bağ yaranacaq. Nəticədə
universitetlərin elmi laboratoriyaları,
elmi şöbələri müəyyən ixtira və araşdırmalarını patentləşdirərək,
iqtisadiyyata ciddi xeyir verəcəklər. Bu
fonda da onlar yeni istehsal və xidmət sahələrinin yaranmasına, burada yeni
texnologiyaların tətbiqinə, aqrar sahə üçün yeni toxumların, gübrələrin
yaradılmasına daha effektiv töhfə verə bilərlər”.