“Ali təhsil müddəti iki və ya üç il olsun...” – Ekspert qanuna dəyişikliklər təklif etdi
11:35 / 30.06.2021
3188
"Mühəndislik, turizm ixtisasları üçün 4 il bakalavr
təhsili almağa ehtiyac yoxdur, onlara iki-üç ilə yiyələnmək olar. Magistratura
pilləsinin bir il olması kifayətdir”.
Bu sözləri Sfera.az-a açıqlamasında "Ali təhsil
haqqında” qanuna hansı dəyişikliklərin edilməsi vacibliyinə toxunarkən, təhsil
eksperti Kamran Əsədov deyib:
"Ali təhsil haqqında” qanunda bakalavr pilləsinin
müddəti, universitetlərə qəbul prosesində hazırlıq qruplarının təşkili, distant
təhsilin təşkili qaydaları, qiymətləndirmə kimi məsələləri həll etməliyik. Ehtiyac
olmayan ixtisaslar üzrə dərslər aparılmamalıdır. Tədris zəruri ixtisaslar üzrə
keçirilərsə, təhsil müddəti azalacaq, təhsil haqqı aşağı düşəcək. Elə bir qanun
qəbul edilməlidir ki, onun ali təhsilin keyfiyyətinin artırılmasında ciddi rolu
olsun”.
Həmsöhbətimiz düşünür ki, ali təhsil müəssisələrinə
muxtariyyət verilməlidir.
O, eyni zamanda bildirib ki, ali məktəbə qəbul
zamanı təqdim edilən test tapşırıqları istiqamətlər üzrə olmalı və orta məktəblərin
məzmununa uyğun gəlməlidir:
"Yəni, mövzular orta məktəblərin məzmununa uyğun
olsa da, test tapşırıqlarının modeli orta məktəbin tədris məzmunundan kənardır.
Magistratura pilləsində informatika və məntiq soruşulur, amma onun hər hansı
formada tədrisi həyata keçirilmir. Ali məktəbə qəbulda test tapşırıqlarından
biri dinləmə mətnləridir. Amma orta məktəbdə tədris zamanı bu avadanlıqdan
istifadə edilmir.
Hamının eyni səviyyədə
yoxlanılması düzgün yanaşma tərzi deyil. Məsələn, informatika müəllimini də,
kompüter və riyaziyyat ixtisasına imtahan verəni də eyni suallarla yoxlayırıq.
Üçüncü ixtisas qrupunda hüquqşünas olmaq istəyənə də, ibtidai sinif müəlliminə
də eyni sualları veririk. Dördüncü ixtisas qrupunda isə tibb təhsili alana da,
baytarlıq ixtisasına yiyələnmək istəyənə də eyni sualları təqdim edirik”.
