Ağadadaş Ağayev: Türkiyədəki evimi satıb, pulunu yeyiblər
22:05 / 01.07.2021
3265
Xalq artisti Ağadadaş Ağayev Türkiyədən qayıtdıqdan sonra ilk dəfə "Günün sədası” proqramına qonaq olub.
Sfera.az xəbər verir ki, veriliş zamanı A.Ağayev səhhətilə bağlı yaşadığı problemlərdən danışıb.
"Xalqımızı çox sevirdim. Amma başıma gələnlərdən sonra onların mənə necə dəstək olduqlarını görüb daha çox sevməyə başladım.
Artıq musiqi fəaliyyətimdə aktiv olacam. Çünki bu yaşama şansı Allah mənə verdi. Xəstəliyimi bilən kimi özümü Allaha tapşırdım. Çünki Allah mənə 65 il şans verib, çox yaxşı yaşamışam. Millətimin, xalqımın qarşısında dürüst olmuşam. İnsan xəstəliyə qalib gəldikdən sonra dünyaya fərqli yanaşır. 4 dəfə əməliyyata girdim. Başa düşdüm ki, insan qədər Allahın sevdiyi ikinci varlıq yoxdur. Həyatımda ilk dəfə ölkəmdən uzaq düşdüm. Ayrı qaldım. İnsanlar mənə zəng edirdi, orqanlarını bağışlamaq istədiklərini bildirirdilər”, - xalq artisti deyib.
A.Ağayev Türkiyəyə səfərləri zamanı orada öz evində qaldığını bildirib. Proqram zamanı sənətçi həmin evin başqa insan tərəfindən satıldığını söyləyib:
"Həmin evimi satıblar, pulunu isə yeyiblər. Halal xoşları olsun. İndi başqa, yeni və kiçik evimiz var. Hava limanına yaxın ərazidə yerləşir”.