"İranla Azərbaycan arasında siyasi-iqtisadi əlaqələrin yeni müstəvidə inkişafı nəzərdə tutulub”.

Bu sözləri Sfera.az-a açıqlamasında Azərbaycan XİN rəhbəri Ceyhun Bayramovun İrana səfərini dəyərlədirərkən politoloq Məhəmməd Əsədullazadə deyib:

"Siyasi-iqtisadi mövzuda müəyyən sazişlər bağlana bilər. Bundan əlavə iki tərəf arasında açıq qalan müəyyən suallar var. Tehran Qarabağda bərpa işlərində iştirakda maraqlıdır. Həmçinin düşünürəm ki, səfər çərçivəsində İran ətrafında baş verən proseslər, İsrailin oradakı fəaliyyəti ətrafında fikir mübadiləsi aparılacaq”.

Həmsöhbətimiz qeyd etdi ki, görüş çərçivəsində hər iki tərəfin bir-birinə qarşı yönələn bazarlıqlarda iştirak etməyəcəyi barədə razılığa gələcəkləri də istisna deyil:

"ABŞ-da Co Baydenin hakimiyyətə gəlişilə ola bilər ki, İrana yönələn bəzi sanksiyalar aradan götürülsün. Bu mənada səfər çərçivəsində şimal-cənub nəqliyyat dəhlizinin daha da inkişaf etdirilməsi məsələsinin müzakirəsi də gözləniləndir. Gələn il İran Prezidentinin Azərbaycana səfəri olacaq. Görünür, həmin səfər öncəsi hansı müstəvidə əlaqələrin inkişaf etdirilməsinin detalları razılaşdırılır”.

Elçin

Sfera.az

.