ABŞ Rusiya hakerlərini ifşa edənlərə 10 milyon dollar mükafat verəcək
10:34 / 16.07.2021
361
Amerika Birləşmiş Ştatları (ABŞ) kompüter sistemlərinə ölkə xaricindən edilən kiber hücumların artmasından sonra bunun qarşısını almaq məqsədilə addım atıb.
Sfera.az xəbər verir ki, ABŞ Dövlət Departamentindən verilən açıqlamada digər dövlətlərin və ya xarici hökumətlərin əmr və göstərişlərinə uyğun olaraq hərəkət edən kiber cinayətkarların şəxsiyyətlərini açıqlayan və ya yerini bildirənlərə mükafat veriləcək.
Böyük əksəriyyəti Rusiyadan qaynaqlanan hücumları həyata keçirən hakerlərin yerini bildirənlərə 10 milyon dollar pul mükafatı təqdim olunacaq.
Departament tərəfindən bu məqsədlə "StopRansomware.gov" adlı bir veb-sayt yaradılıb.
Veb-saytda kiber hücumlara məruz qalan şirkətlərə və şəxslərə təlimatlar verilir və özlərini necə qorumaq barədə bəzi məlumatlar təqdim olunur.
Milli Təhlükəsizlik Departamentinin məlumatına əsasən təkcə 2019-cu ildə xarici ölkələrdən qaynaqlanan kiber hücumlardan sonra təxminən 300 şirkət və hüquqi şəxs ümumilikdə 350 milyon dollar fidyə ödəyib.
Əzizə Zeynal
Sfera.az