Maraqlıdır, ABŞ-Ermənistan yaxınlaşmasına Rusiyanın münasibəti necə olacaq? Tərəflər arasında imzalanan saziş özündə nəyi ehtiva edir? 

Məsələ ilə bağlı Sfera.az-a danışan Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov ABŞ-ın Ermənistanda güclənmə istəyinin olduğunu deyib. Ekspert yeni sazişin arxa planında bir neçə məsələnin dayandığını bildirib:

"Rusiya Qərb ölkələrinin, xüsusilə də ABŞ-ın Ermənistanla yaxın münasibət qurmağına razı deyil. Xüsusilə indi, münasibətlərin gərgin olduğu vaxtda bu narazılıq aktualdır. Rusiya II Qarabağ müharibəsi zamanı bəzən geri addım ataraq, məsələlərə çox da müdaxilə etməyərək, əslində Ermənistana dərs verməyə çalışırdı. İndi isə Ermənistan ABŞ-la strateji müttəfiqliklə bağlı müqavilə bağlayıb. Aydın məsələdir ki, müqavilənin şərtində əsas hədəf ABŞ-ın Ermənistanda daha da güclənməsindən ibarətdir. Cənubi Osetiya və Abxaziya, Qarabağda münaqişəli məsələlər sonlanmadığı üçün Ermənistan ABŞ-a görə strateji əhəmiyyət daşıyır. Ermənistanın İranla sərhəd olması da ABŞ-ın maraqlarını təmin edir. İmzalanan müqavilənin şərtlərində iqtisadi-siyasi, enerji sahəsində əməkdaşlıqdan söz açılır”.

Politoloq Ermənistan-ABŞ yaxınlaşmasının Azərbaycan üçün əhəmiyyət daşıyacaq tərəfindən də söz açıb:

"Arxa planda digər məqsəd Azərbaycanın enerji resurslarının Qərb bazarına çıxarılmasıdır. Ermənistanla münasibətlərin qurulması, ABŞ nümayəndə heyətinin Azərbaycana səfər etməsindən aydın olur ki, ABŞ tərəflər arasında sülhün əldə olunmasında maraqlıdır. Ona görə ki, ABŞ Xəzər hövzəsindən daha çox enerji resursları idxal etmək niyyətindədir. Rusiyanın belə məqamda sakit dayanacağı gözlənilmir. Çox güman ki, Azərbaycan-Ermənsitan sərhədində,  rus sülhməramlılarının yerləşdiyi Qarabağ ərazisində də gərginləşmə, atəşkəsin pozulması gözləniləndir. Ermənistanda isə Paşinyana qarşı etirazlar daha da alovlanacaq. Artıq məlumat var ki, Paşinyana qarşı etirazlara Robert Köçəryan da qoşulub. Bu, Köçəryanın Paşinyana bir növ "buynuz” göstərməsidir. Düşünürəm ki, Rusiya bütün gücünü ortaya atacaq ki, provakasiya olsun. Lakin bunun Ermənistan-ABŞ münasibətlərinə təsiri olmayacaq”.