84 saylı Füzuli seçki dairəsindən deputatlığa namizəd Vüqar Bayramovun seçki qərargahının mətbuat açıqlaması
14:25 / 10.02.2020
2773
9 fevral növbədənkənar parlament seçkilərində öz layiqli övladına – Vüqar Bayramova
göstərdiyi etimada, güvənə və dəstəyə görə hər bir həmyerlimizə təşəkkür edir, seçkilərin normal
gedişini pozmağa çalışan bəzi deputatlığa namizədlərə münasibətdə sağlam vahid iradə nümayiş
etdirib, soyuğa, şaxtaya baxmayaraq, aktiv şəkildə seçkilərdə iştirak edən seçicilərimizə
minnətdarlığımızı bildiririk.
Sağlam rəqabət şəraitində keçən mübarizədə aldıqları məğlubiyyəti həzm edə bilməyən
bəzi deputatlığa namizədlərin və onlara yaxın mətbu orqanların heç bir təsdiqedici faktlara
əsaslanmayan iddiaları bilərəkdən ölkə ictimaiyyətini çaşdırmağa yönəlmiş, ittihamların hamısı
ümumi sözlərdən ibarət olmaqla heç bir sübuta, dəlilə əsaslanmamışdır.
Seçki günü Vüqar Bayramovun qərargahı seçki prosesini diqqətlə izləmiş, eyni zamanda
dairə seçki komissiyası tərəfindən əvvəlcədən müşahidəçi statusu əldə etmiş könüllülər 84 saylı
Füzuli seçki dairəsinin bütün məntəqələrində digər müşahidəçilərlə yanaşı, prosesi müşahidə
etmişlər.
Bütün məntəqələrdə namizədlərin müşahidəçilərinə seçki prosesini maneəsiz izləmələrinə
bərabər imkanların yaradılması, səslərin sayılması prosesində müşahidəçilərin məntəqə
komissiyasının üzvləri ilə birlikdə yaxından iştirakı, hətta bu prosesin müşahidəçilər tərəfindən
sosial şəbəkələrədə canlı şəkildə yayımlanmasına imkan yaradılması 84 saylı Füzuli seçki
dairəsində seçkilərin yüksək şəffaflıq şəraitində keçirilməsinin bariz nümunələrindəndir.
Vüqar Bayramovun seçki qərargahı ölkədə şəffaf və ədalətli seçkilərin keçirilməsi ilə
bağlı ölkə rəhbərliyinin nümayiş etdirdiyi siyasi iradəni xüsusi olaraq vurğulayaraq, 84 saylı
Füzuli seçki dairəsində şəffaf seçki prosesinə kölgə salmağa çalışanların provokativ
hərəkətlərinin qarşısını vaxtında almağı bacarmış dairə seçki komissiyasının və məntəqə
komissiyalarının rəhbərliyinə təşəkkürünü bildirir, Azərbaycanın müxtəlif bölgələrində
məskunlaşmış Füzuli rayonundan olan məcburi köçkün seçicilərə seçkiyə göstərdikləri yüksək
maraqlarına və fəal iştiraklarına görə bir daha dərin minnətdarlığını ifadə edir.