Sfera.az-ın sərhəd və sərhədboyu ərazilərdə baş verən təxribatlarla əlaqədər suallarını ehtiyatda olan polkovnik Şair Ramaldanov cavablandırıb:

- Ermənilərin sərhədboyu təxribat törətməsində təəccüblü hal yoxdur, çünki biz hələ də onlarla müharibə şəraitindəyik və sülh müqaviləsi bağlanmayıb. 30 ildir ki, biz atəşkəs rejimində yaşayırdıq, lakin buna əməl edən yox idi. Dövlət sərhəddində belə hal olarsa, buna beynəlxalq müstəvidə yanaşma olmalıdır. Ermənistanın sərhədlərinə zəmanəti Rusiya verir. Yəni Rusiya hansısa üçüncü dövlətin Ermənistanın sərhədinə hücum edecəyi halda onların tərəfindən çıxış edəcək. Azərbaycan işğaldan azad olunan ərazilərdə öz sərhədlərini qurmaqdadır. 1976-cı ildə təsdiq olunmuş coğrafi xəritə artıq qurulmaqdadır. Hazırda Ermənistanda hökumət tam oturuşmayıb və çox zəifdir. Onların təsərrüfat qurduğu yerdə indi Azərbaycan müəyyən işlər görür ki, bu da orada gərginliyin artmasına səbəb olur. 

- Məntiqlə ordu dövlətə tabedir və əmrə əsasən ordu bir nöqtədə dayanmalıdır. Lakin Ermənistan variantında belə deyil. İndi orada hər şey bir-birinə qarışıb. Hakimiyyətsizliyin olduğu bir ölkədə müəyyən qüvvələr öz təxribat fəaliyyətini davam etdirir. Onu da deyim ki, Ermənistan hakimiyyəti də bizim dövlət sərhəddi qurma istəyimizə qarşıdır. Onlar istəyir ki, bu məsələyə Rusiyanın Təhlükəsizlik Şurasına üzv olan ölkələrin diqqətini cəlb etsinlər. Artıq müəyyən mənada buna nail olublar. Məsələn, Rusiya sərhədlərin delimitasiyası mövzusunda vasitəçi kimi çıxış edir. 

- Əlbəttə ki, biz sakitliyə nail ola biləcəyik. Dövlət sərhəddimiz tam qurulduqdan sonra bu kimi hallar olmayacaq. Azərbaycan adekvat cavab açaraq qarşı tərəfi susdurmağa naildir. Azərbaycan əsgəri indi qələbə ruhlu əsgərdir. Biz bilirik ki, Ermənistan muzdlu əsgər gətirib müharibədə onlardan istifadə edirdi. İndi də belə şəxslər onların arasında çoxdur və həmin insanlar təxribata şərait yaradır. Lakin heç kim Azərbaycana öz sərhəddini qurmağa mane ola bilməz. Biz bu işi yekunlaşdıracağıq.

- Bəli, düşünürəm ki, yaxın vaxtlar ərzində Azərbaycan və Ermənistan arasında sülh sazişi imzalanacaq. Çünki hazırda sürətlə Zəngəzur istiqamətində logistik yolları açırıq, Füzulidə aeroport fəaliyyətə başlayacaq. Bütün bu işlər Zəngəzur dəhlizinin açılmasına istiqamətlənib. Ermənistan tərəfi sülh sazişini imzalamasa, Zəngəzur dəhlizi açıla bilməz. Zəngəzur dəhlizinin açılmasına isə Azərbaycandan əlavə Rusiya, Çin, Türkiyə kimi ölkələr maraqlıdır. Bu baxımdan dəhlizin açılmasından az əvvəl, yəni sözügedən məsələ gündəmə gələn kimi sülh sazişi də imzalanacaq.